Na Yuni 20, 2021, mpangi Robert Batko ya Komite ya Filiale ya Amérique centrale basisaka Biblia—Mbalula ya Nsi-Ntoto ya Mpa (Matayo-Kusonga) na ndinga Chol. Bo basisaka Biblia yango na format yina beto ke sadilaka na baapareyi mpi bantu kiteso ya 800 landaka video ya manaka yai ya bo kotisaka dezia ndinga.

• Bantu ke tubaka ndinga Chol mingi-mingi na provense ya Chiapas na ndambu ya sudi-esti ya Mexique

• Bantu kiteso ya 200 000 ke tubaka ndinga Chol

• Bampangi kuluta 500 ya ke longaka nsangu ya mbote (bansamuni) ke sadilaka Yehowa na mabundu 22 mpi bimvuka zole ya ke salaka balukutakanu na ndinga Chol

• Bampangi 3 ya ke salaka kisalu ya kubalula bantu salaka kisalu yai. Bo salaka yo bangonda 27

Mpangi-bakala mosi yina pesaka mpi maboko na kisalu ya kubalula Biblia yai tubaka nde: “Biblia yai ya mpa ke sadila bangogo ya pete yina beto ke sadilaka bilumbu yai. Mono kele na kiese ya kutanga konso kapu.”

Mpangi-bakala ya nkaka tubaka nde: “Mono ke tangaka Biblia na Kiespaniole kansi ntangu mono ke tangaka yo na ndinga Chol, yo ke simbaka mpenza ntima na mono. Yo kele bonso mono ke dia madia mosi ya kitoko yina bo me lamba na nzo.”

Beto ke ndima nde Biblia yai na ndinga Chol ta sadisa bampangi na beto ya ke tubaka ndinga yai na kuzwa “bimvwama yina me bumbanaka” na Ndinga ya Nzambi Biblia.—Bingana 2:4, 5.