Na Lumingu 27 février 2022, mpangi Carlos Cázares ya Komite ya Filiale ya Amérique centrale salaka diskure ya kubasika ya Biblia—Mbalula ya Nsi-Ntoto ya Mpa ya Masonuku ya Kigreki ya Bukristu na ndinga Tlapanèque. Bo ta basisa Biblia yai ya bapapie na nima kaka na mvula yai. Bantu kiteso ya 820 landaka manaka yai ya bo kotisaka ndinga na nzila ya video.

Kisalu ya kubalula Biblia yai yantikaka na juillet 2020 na nsungi ya maladi ya coronavirus. Mpangi mosi ya pesaka mpi maboko na kisalu ya kubalula Biblia yango tubaka nde: “Ata beto kutanaka ti bampasi, yo vandaka kiese na kumona nde beto kukaka kumanisa yo na nima ya mvula mosi ti ndambu. Yehowa sadisaka beto na kusala kisalu yango nswalu.”

Biblia yai ya mpa ke sadila bangogo ya pete yina bantu lenda bakisa yo kukonda mpasi ntangu bo ke tanga. Mambu ya kele na Matayo 5:3 ke monisa yo pwelele. Na Babiblia ya ntama verse yai vandaka kutuba nde: “Kiese na bantu yina ke zabaka nde bo lenda kuka ve kusala ata kima mosi kukonda lusadisu ya mpeve santu,” to “Kiese na bantu yina kele ti mpeve ya kulemba.” Kansi Biblia—Mbalula ya Nsi-Ntoto ya Mpa ya Masonuku ya Kigreki ya Bukristu ke balula yo mutindu yai: “Kiese na bantu yina ke bakisaka mbote nde bo fwete sosa Nzambi.”

Biblia yai ya mpa ta sadisa bansamuni na kulonga mbote nsangu ya mbote. Ntangu mpangi Cázares vandaka kusala diskure, yandi tubaka nde: “Nzambi Nkwa-Ngolo Yonso ke zola nde bantu kuwa nsangu ya mbote na bandinga na bo mosi, ndinga yina bo ke tubaka konso kilumbu kansi ve na bandinga yina bo ke bakisaka ve mbote.”

Beto kele na kiese sambu na bampangi na beto ya babakala mpi ya bankento yina ke tubaka ndinga Tlapanèque sambu na Biblia yai ya me basika, mpi beto kele na kiese ya kusadila Yehowa ti bo “dipeka na dipeka.”—Sefania 3:9.