Na kilumbu ya Mposo Augusti 15 mpi ya Lumingu Augusti 16, 2020, Bambangi ya Yehowa ya Mozambique vandaka na kiese ya kuzwa Mbalula ya Nsi-Ntoto ya Mpa ya Masonuku ya Kigreki ya Bukristu yina bo lenda tanga na baapareyi na ndinga Changana mpi na ndinga Makua. Bambangi ya Yehowa kuluta 8000 ya ke longaka nsangu ya mbote ke tubaka ndinga Changana mpi Bambangi ya Yehowa kuluta 1700 ke tubaka ndinga Makua.

Mpangi David Amorim, yina kele na Kimvuka ya Bampangi Yina Ke Twadisaka Bisalu na Betele ya Mozambique muntu basisaka Babiblia yango. Yo vandaka manaka mosi ya bo me kotisaka dezia ndinga mpi ya bo filimaka, ebuna bampangi landaka yo. Diaka, bampangi na beto bakaka nswa ya kusonga manaka yina na televizio mpi ya kulutisa yo na baradio kuluta 30 ya insi yai.

Bo ke tubaka ndinga Changana mingi-mingi na baprovense zole na sudi ya Mozambique. Kuna bantu kiteso ya 1,9 milio ke tubaka yo. Yo kele kibeni bonso ndinga Tsonga yina bantu mingi ke tubaka na Afrique du sud, insi yai kele pene-pene ti Mozambique.

Teritware yina bantu ke tubaka ndinga Makua kele na baprovense ya nordi ya Mozambique. Bantu kiteso ya 5,8 milio ke tubaka ndinga Makua mpi yo kele ndinga yina bantu mingi ya me butukaka na Mozambique ke tubaka.

Banda ntama, yo vandaka mpasi kibeni sambu bampangi ya ke tubaka bandinga yina kuzwa Biblia. Babiblia vandaka ntalu mpi bantangu ya nkaka, bamagazini yina ke tekaka Babiblia vandaka kubuya kutekila yo Bambangi ya Yehowa. Mpangi mosi ya ke salaka kisalu ya kubalula mikanda ke tuba nde: “Mono monaka mabundu mingi ke sadila kaka Biblia mosi. Bo vandaka kubika yo na Nzo ya Kimfumu sambu bampangi yina ke salaka badiskure mpi bayina kele ti masolo kusadila yo ntangu bo ke sala masolo na bo na kati-kati ya mposo.”

Beto ke sepela ti bampangi na beto ya bankento mpi ya babakala yina me zwa Masonuku ya Kigreki ya Bukristu na ndinga Changana mpi na ndinga Makua. Beto ke ndima nde Babiblia yai ta sadisa bantu mingi na “kubaka nzayilu ya sikisiki ya kieleka.”—1 Timoteo 2:3, 4.