Na Lumingu 19 juin 2022, Mpangi Patrick Hecker yina kele na Komite ya Filiale ya Mozambique basisaka Biblia—Mbalula ya Nsi-Ntoto ya Mpa (Matayo-Kusonga) na ndinga Lomwe. Bo basisaka Biblia yango ya bantu lenda sadila na baapareyi na manaka mosi ya bo kotisaka dezia ndinga. Bansamuni mingi ya ke vandaka na mabundu yina ke salaka balukutakanu na ndinga Lomwe vukanaka na manaka yina na Banzo ya Kimfumu na bo mpi kuna konso muntu bakaka Biblia mosi ya papie.

Babiblia ke vandaka dezia na ndinga Lomwe banda na 1930. Kansi bo ke tekaka yo ntalu mpi ndinga Lomwe yina bo sadilaka vandaka ya ntama. Katula yo, mambu yina bo sonikaka vandaka ve ya siki-siki. Mu mbandu, na Babiblia yina ke vandaka dezia, bo me balulaka verse ya Luka 23:43 nde: “Mono ke tubila nge mambu ya kieleka: yantika bubu yai, nge ta vandaka ti mono na Paladisu.” Kansi na Biblia—Mbalula ya Nsi-Ntoto ya Mpa, bo me balula verse yango mutindu yai: “Ya kieleka mono ke tubila nge bubu yai nde, nge ta vanda ti mono na Paladisu.”

Mbaludi mosi tubaka sambu na Biblia yai ya mpa nde: “Biblia—Mbalula ya Nsi-Ntoto ya Mpa (Matayo-Kusonga) na ndinga Lomwe kele pwelele mpi mpasi ve na kutanga. Bampangi ta bakisa kukonda mpasi mambu yina baverse ke tendula mpi bo ta sadila mambu yina bo ke longuka kukonda mpasi.”

Beto ke tula ntima nde Biblia yai ta sadisa bampangi na beto ya bankento mpi ya babakala na kulanda kuvanda pene-pene ya Yehowa mpi na kusadisa bantu yina bo ke kutana ti bo na kisalu ya kulonga nsangu ya mbote.—Matayo 5:3.