Na insi Nigéria, bo me katuka kukangula banzo zole yina bo ta sadilaka sambu kupesa bampangi formasio na banzo-nkanda ya Kimfumu. Bo ta sadilaka banzo yango mingi-mingi sambu na Nzo-Nkanda ya Bansamuni ya Kimfumu (EER). Banzo yina ya kele na Uli yambaka bana ya nzo-nkanda ya ntete na février 2023, mpi yina kele na Ibadan na Kitanu 2 juin 2023. Na bisika yina banzo-nkanda yango kele, bo ta sala mpi Nzo-Nkanda ya Bankengi ya Nziunga mpi Bankento na Bo.

Bo me tunga banzo-nkanda yina zole na balupangu yina ke vandaka dezia ti Banzo ya Balukutakanu ya Nene mpi konso nzo-nkanda kele ti nzo yina bo ta longilaka bana ya nzo-nkanda, biblioteke mosi, mpi bashambre sambu na bana ya nzo-nkanda. Betele ya Nigéria ke bakaka konso mvula baformilere kuluta 500 sambu na Nzo-Nkanda ya Bansamuni ya Kimfumu. Yo yina, konso kisika yina banzo-nkanda yai kele na insi yai, bo ta kumaka kusala nde banzo-nkanda iya kusalama konso mvula. Banzo-nkanda ta salamaka na Kingelesi, na ndinga Igbo, ndinga Pidgin ya Afrika ya Westi mpi ndinga Yoruba.

Bana ya nzo-nkanda yina me katuka kubaka maplome na Nzo-Nkanda ya Bansamuni ya Kimfumu yina me katuka kusalama na Uli me sepela mingi sambu kisika yina kele pima mpi kitoko. Na mukanda yina bo me sonika sambu na kupesa mersi, bo me tuba nde: “Kisika yai kele pima mpi bashambre kele kitoko. Yo me sala nde betu tula dikebi ya mingi na mambu ya beto vandaka kulonguka mpi na kuwa kiese mutindu beto me kota nzo-nkanda yai. Bampangi-babakala mpi bankento ya ke yidikaka kisika yai mpi bavolontere ya nkaka, bo yonso salaka ngolo sambu na kulungisa bampusa na beto mpi bo salaka yonso sambu betu mona nde bo ke zolaka beto.”

Beto ke ndima kibeni nde banzo-nkanda yai ya bo me katuka kutunga sambu na kupesa bampangi formasio ta sadisa bampangi na beto ya babakala mpi ya bankento ya insi Nigéria na ‘kulungisa mbote-mbote kisalu na bo.’—2 Timoteo 4:5.