Banda na Kitanu 1^er avril 2022, Bambangi ya Yehowa bandaka diaka kusala balukutakanu na Banzo ya Kimfumu. Bampangi na beto ya nkaka vandaka kuwa boma ntangu yo lombaka nde beto vutukila kusala balukutakanu kimuntu-kimuntu na Banzo ya Kimfumu. Kansi ntangu bo kwendaka na balukutakanu yango, boma yina manaka mpi bo vandaka kuseka, kudila sambu na kiese mpi kuyimba na kiese bankunga ya Kimfumu ti bampangi ya nkaka.

Sambu na bantu ya nkaka, yo vandaka mbala na bo ya ntete ya kukwenda na Nzo ya Kimfumu.

Mpangi-bakala Krzysztof Hoszowski, na insi Pologne, ke tuba nde: “Yo vandaka mbala na mono ya ntete ya kukwenda na balukutakanu kimuntu-kimuntu na Nzo ya Kimfumu. Mono vandaka kulonguka malongi ya kieleka ya Biblia na nzila ya baapareyi mpi mono landaka diskure ya mbotika na mono na zoom. Mono zabaka mutindu balukutakanu ya kimuntu-kimuntu ke salamaka sambu mono vandaka kutala yo na bavideo mingi. Ntangu mono kwendaka na mbala ya ntete na lukutakanu na Nzo ya Kimfumu, mono waka kiese sambu bampangi vandaka kuzolana, bo vandaka na kiese mpi bo vandaka kusadilana mambu na mutindu ya mbote.”

Na mars 2020, ntangu maladi yai coronavirus panzanaka na ntoto ya mvimba, Bambangi ya Yehowa yantikaka kusala balukutakanu na nzila ya zoom. Bantu yina ke kukaka ve kukwenda na balukutakanu na Nzo ya Kimfumu kele kaka ti dibaku ya kulanda yo na nzila ya baapareyi.

Mpangi-bakala Neil Campbell, na mbanza Édimbourg na insi Écosse, ke tuba nde: “Ntangu miziki yantikaka kubula mpi ntangu mono yantikaka kuyimba nkunga ya ntete, mono waka kiese mingi ya kuvukana diaka na mbala ya ntete ti bampangi na mono na nima ya bamvula zole.”

Beto ke pesa Yehowa mersi mingi sambu yandi me sakumuna balukutakanu yai ya beto me kuma diaka kusala kimuntu-kimuntu.—Nkunga 84:10.