Maladi yai ya coronavirus (COVID-19) me sala nde Bambangi ya Yehowa mingi kibeni kusoba luzingu na bo. Bo ke sala yonso yina bo lenda sala sambu na kuzitisa bansiku ya bamfumu ya leta mpi kulanda kusambila Yehowa. Na bansi yina bantu mingi me baka maladi yai, bampangi na beto ke landa kusadila bametode ya mutindu na mutindu sambu na kulonga nsangu ya mbote.

Mpangi-bakala mosi na Pise, na insi Italie tubaka nde: “Beto ke sala kisalu ya kulonga bantu na mutindu mosi ya mbote kibeni! Mutindu bantu mingi kele na banzo na bo, mono ti nkento na mono beto ke talaka banimero ya bantu yina beto kele ti yo na batelefone na beto mpi beto ke yidikaka mambu sambu na kusolula ti bantu mingi na kati na bo na nzila ya video. Beto ke longuka Biblia ti bantu mingi mpi beto ke vutukilaka bo mbala mingi, beto ke zwa mpi bantu ya mpa mpi beto ke solula ti bantu yina beto me solulaka ti bo dezia mpi beto ke solula mbote ti bantu mingi.”

Na Corée du Sud, maladi yai me pusa Bambangi ya Yehowa ya ke longaka nsangu ya mbote na kusadila diaka mingi mambu ya kele na site Internet na beto jw.org mpi programe JW Library. Mu mbandu, mpangi-bakala mosi bakaka message yina katukaka na muntu mosi yina yandi vandaka kulonguka Biblia ti yandi ntama. Muntu yango yambulaka kulonguka bamvula tatu na ntwala. Longoki yina ya Biblia tubaka nde maladi yai me pusa yandi na kuyindula mingi kidimbu ya bilumbu ya nsuka. Mpangi-bakala yina sadilaka kitini “Partager” ya programe JW Library sambu na kutindila muntu yina vandaka kulonguka ti yandi Biblia ntama malongi ya mfunu na yina me tala bilumbu ya nsuka na nzila ya message. Mpangi yina ke tuba nde “yo pesaka mono kikesa na kumona nde diambu yai ya kele na kati ya kidimbu ya bilumbu ya nsuka me pusa bantu mingi na kusosa kuzaba mambu mingi na yina me tala Nzambi mpi Biblia.”

Barapore mingi ya ke katuka na Babetele na nsi-ntoto ke monisa nde bampangi na beto ya babakala mpi ya bankento ke baka kisalu na bo ya kulonga nsangu ya mbote na valere. Yo kele kibeni diambu ya mbote na kumona mutindu bo ke sadila “mayele” sambu na kulanda kulonga nsangu ya mbote.—Mika 6:9.