Na Kitanu 15 avril 2022, bamilio ya Bambangi ya Yehowa ya ntoto ya mvimba mpi bantu yina bo bingisaka salaka Nkinsi ya Madia ya Nkokila ya Mfumu. Yo vandaka mbala na bo ya ntete banda na 2019 ya kusala diaka lukutakanu yai ya mfunu kimuntu-kimuntu. Bantu yina vandaka ve ti mpila ya kuvukana kimuntu-kimuntu ti bantu ya nkaka ya mabundu na bo na Nkinsi ya Kuyibuka Lufwa ya Yezu ya mvula yai, landaka yo na nzila ya baapareyi.

Nkinsi ya Kuyibuka Lufwa ya Yezu kele lukutakanu ya kuluta mfunu ya mvula sambu na Bambangi ya Yehowa. Maladi ya coronavirus salaka nde beto sala nkinsi yai na nzila ya video bamvula zole. Bantu kuluta 21 millions salaka Nkinsi ya Kuyibuka Lufwa ya Yezu na 2021.

Sambu na bantu ya nkaka, mu mbandu Markensia Remy na insi Haïti, yo vandaka mbala na bo ya ntete ya kuvukana ti bantu ya nkaka kimuntu-kimuntu na Nkinsi ya Kuyibuka Lufwa ya Yezu. Mvula mosi me luta banda Markensia bakaka mbotika. Yandi ke tuba nde: “Mono kele na kiese ya kusala Nkinsi ya Kuyibuka Lufwa ya Yezu na Nzo ya Kimfumu. Mono me konda nkutu mambu ya kutuba sambu na kumonisa kiese yina mono ke wa. Mono ke ndima mpenza nde mono kele na dibuta mosi ya mbote kibeni.”

Beto ke pesa Yehowa mersi mutindu yandi me sakumuna Nkinsi ya Kuyibuka Lufwa ya Yezu ya mvula yai. Beto ke pesa yandi diaka ti Mwana na yandi Yezu Kristu mersi mingi sambu na zola ya kuluta nene yina bo me monisilaka beto.—Yoane 3:16.