Kupesa maplome ya Nzo-nkanda ya 148 ya Gileadi salamaka bonso ya Banzo-nkanda yonso ya ntama, kansi diambu mosi salamaka ve mutindu yo ke salamaka ntete: bawi vandaka ve na nzo yina bo ke pesaka maplome. Bantu yonso landaka manaka yina kaka na ntangu yo vandaka kusalama na nzila ya video. Kupesa maplome ya Nzo-nkanda yai ya Gileadi me salama na ntangu yai ya maladi me panzana na ntoto ya mvimba; yo ke monisa pwelele nde dibundu ya Yehowa ke salaka bansoba na kutadila mutindu mambu ke salama.

Manaka ya kupesa maplome salamaka na Marsi 14, 2020 na nzo ya malongi ya Bambangi ya Yehowa na Patterson, na New York. Mpangi Stephen Lett ya Nto-Kimvuka muntu twadisaka manaka yina. Bo pesaka maplome na bana ya Nzo-nkanda 55. a

Bamposo na ntwala nde manaka yina kusalama, beto vandaka kuwa bansangu mingi ya maladi yai ya bo ke binga nde coronavirus, ya me panzana na ntoto ya mvimba. Mutindu beto monisaka yo na jw.org na kitini Bansangu, Nto-Kimvuka ya Bambangi ya Yehowa vandaka kutadila konso ntangu diambu yai mpi vandaka kupesa mabundu yonso bandongisila ya ke wakana ti bansiku ya bamfumu ya leta.

Bamfumu ya leta buyaka nde bantu mingi kuvukana kisika mosi. Sambu na kikuma yai mpi bikuma mingi ya nkaka, Nto-Kimvuka bakaka lukanu nde bo ta bingisa ve ata muntu sambu na kulanda manaka yai mpi nde ata muntu mosi ve ta kwisa na nzo yina bo ke pesaka maplome. Bampangi ya ke sadilaka Yehowa na Betele mpi bana ya Nzo-nkanda ya Gileadi pesaka mbandu ya mbote mutindu bo lemfukaka na lukanu yai ya Nto-Kimvuka.—Yoane 13:34, 35.

Ata mpidina, bo yidikaka mambu sambu bantu yina bana ya Nzo-nkanda ya Gileadi mpi bampangi ya ke sadilaka Yehowa na Betele ta bingisa kulanda manaka yina na nzila ya video kaka na ntangu yo ke salama. Yo sadisaka bampangi kuluta 10000 na ntoto ya mvimba, banduku mpi bantu ya mabuta ya bana ya Nzo-nkanda ya Gileadi na kulanda manaka yai kaka na ntangu ya yo ke salama.

Nto-Kimvuka ke zola nde beto landa kuvukana sambu na kusambila Yehowa, mingi-mingi sambu na lukutakanu ya kati-kati ya mposo, ata maladi yai ya COVID-19 me panzana bisika yonso. Yo yina, Nto-Kimvuka me katuka kupesa bandongisila na Babetele ya ntoto ya mvimba sambu bo tala mutindu ya kusoba balukutakanu ya dibundu na kutadila bansi na bo. Na bansi ya nkaka, yo ta lomba nde bansamuni kuvukana na bimvuka ya fioti-fioti to na nzila ya video (vidéoconférence). Beto ke tula ntima nde, bampangi yonso ya ntoto ya mvimba ta landa kubaka mambote ya madia ya kimpeve yina organizasio ya Yehowa ke landa kutinda na mabundu yonso.

Yo kele pwelele nde, ata kima mosi ve lenda kanga Yehowa nzila ya kusadila ngolo na yandi sambu na kusadisa organizasio na yandi na kununga konso mpasi yina.—Nkunga 18:29.