Na 17 décembre 2021, bansi mingi ya kele na kimvuka ya bo ke bingaka Alliance internationale pour la liberté religieuse a (IRFBA) salaka mukanda sambu na kulomba nde bo yambula kumonisa Bambangi ya Yehowa mpasi sambu na lukwikilu na bo. Na mukanda yina, bo lombaka nde bo basisa na nswalu yonso Bambangi ya Yehowa yina bo tulaka na boloko mpi bo bika kubula bo, kukota na ngolo na banzo na bo mpi kubakila bo bangindu ya mbi.

Bambangi ya Yehowa yonso yina bo me kanga kele kuluta 150. Bo kele na bansi yai: Crimée, Érythrée, Russie, Singapour mpi Tadjikistan. Bansi ya kele na kimvuka yai (IRFBA) “ke kudiyangisa mingi” mutindu “bo ke niokula Bambangi ya Yehowa mingi kibeni” mpi bo ke tuba diaka nde Bambangi ya Yehowa kele ti nswa ya kusambila “kukonda kuwa boma mpi kukonda nde bantu kubula bo, kuniokula bo to kubakila bo bangindu ya mbi.”

Beto ke pesa matondo mingi na bansi yina ke ndima na luzolo yonso na kukotila beto sambu na banswa na beto ya kusambila na ngemba yonso. Beto ke ndima kibeni nde Yehowa ta landa kutanina bampangi na beto yina bo ke monisa mpasi, bayina ke landa kutudila yandi ntima mpi yandi “ta pesa bo ngemba ya ntangu yonso.”—Yezaya 26:3.