3 MAI 2022
BANSANGU YA NTOTO YA MVIMBA
“Beno Landa Kukumisa Kinduku na Beno ti Yehowa Ngolo”
Lukutakanu Mosi ya Mfunu Me Pesa Bampangi ya Ukraine mpi ya Pologne Kikesa
Na Kizole 26 avril 2022, mpangi Mark Sanderson ya Nto-Kimvuka ya Bambangi ya Yehowa kumaka na Pologne sambu na kupesa bampangi ya babakala mpi ya bankento ya ke kudiyangisa sambu na bitumba ya Ukraine kikesa.
Na mbanza Varsovie na Pologne, bampangi ya babakala ke landila mambu ya tekiniki na Nzo ya Balukutakanu ya Nene
Bo bingisaka mabundu yonso ya Pologne mpi ya Ukraine na kulanda lukutakanu mosi ya mfunu yina bo salaka na Mposo 30 avril 2022. Na Pologne, bampangi ya Ukraine yina tinaka bitumba mpi bampangi yina vandaka kupesa maboko na bisalu ya kusadisa bantu yina me bwila mpasi vandaka mpi na kati ya bantu yina landaka lukutakanu yai kimuntu-kimuntu na Nzo ya Balukutakanu ya Nene na mbanza Varsovie. Bantu ya nkaka mpi kuluta 250 000 na Pologne mpi na Ukraine landaka lukutakanu yai na nzila ya video.
Mpangi Sanderson tubaka nde: “Bampangi ya babakala mpi ya bankento ya ntoto ya mvimba ke yindula beno mpi bo ke samba sambu na beno. Na babiro ya ke twadisaka kisalu na beto na ntoto ya mvimba, bampangi ke sambaka konso kilumbu sambu na bampangi na beto ya Russie mpi ya Ukraine. Bampangi ya Nto-Kimvuka mpi ke sambaka sambu na bo na balukutakanu yina bo ke salaka.” Yandi songaka mpi bampangi nde: “Bampasi yina beno ke kutana ti yo ke tendula ve nde Yehowa me yambula beno. Yandi ke mona beno, yandi ke zola beno mpi yandi kele mpenza pene-pene ti beno ya ke niokwama.”
Bampangi ya babakala mpi ya bankento yina tinaka bitumba na mbanza Marioupol na Ukraine ke landa lukutakanu yai ya mfunu
Mpangi Sanderson tubaka diaka nde: “Beno landa kukumisa kinduku na beno ti Yehowa ngolo. Lukanu na beto kele ve kaka ya kukanga ntima na bampasi yai kansi beto ke zola nde na nima ya bampasi yai, lukwikilu na beto mpi kinduku na beto ti Yehowa kukuma diaka ngolo. Yai mambu ya Yehowa ke longaka beto.”
Serhiy kele nkuluntu na dibundu mosi na mbanza Odessa na Ukraine. Yandi tubaka nde: “Na bamposo ya me katuka kuluta, mpila ya kulala mpongi vandaka diaka ve sambu mono vandaka kudiyangisa, mono kumaka mawa-mawa mpi boma-boma. Kansi [lukutakanu yai ya mfunu], me kumisa diaka lukwikilu na mono ngolo mpi yo me pusa mono na kundima nde Yehowa ke tudilaka bansadi na yandi dikebi yo vanda na kimvuka mpi mosi-mosi.”
Mpangi-nkento Tatiana, yina katukaka na mbanza Kiev na Ukraine mpi tinaka bitumba, ke tuba nde: “Bubu yai, mono ke kudiwa diaka pene-pene ya Yehowa. Mono ke mona mpenza zola na yandi mpi ke wa bonso nde yandi ke yamba mono na maboko na yandi. Na konso kisika yina beto kele, Yehowa kele kaka ti beto.”
Beto ke zolaka bampangi na beto mingi. Beto ke ndima mpi nde lukutakanu yai ya mfunu me yibusa bo diaka “zola . . . ya kwikama” yina Yehowa ke vandaka ti yo sambu na bansadi na yandi.—Nkunga 136:1.
