Na 25 mpi 26 juin 2022, organizasio na beto salaka kima mosi ya kuyituka: Beto basisaka Biblia Mbalula ya Nsi-Ntoto ya Mpa na bandinga 13. Ntete, ntalu ya kuluta mingi ya Babiblia yina basikaka na nsuka ya mposo mosi vandaka kaka sambanu. Mambu ya ke landa kele rapore ya mambu yina salamaka na kilumbu yina.

Mpangi Armando Ochoa ya komite ya filiale ya Amérique centrale salaka diskure ya kubasika ya Biblia Mbalula ya Nsi-Ntoto ya Mpa ya Masonuku ya Kigreki ya Bukristu na ndinga Tzeltal. Bantu kiteso ya 1 400 landaka manaka yai ntangu yo vandaka kusalama. Bo basikaka Biblia yango ya papie ti yina bo lenda tanga na apareyi (version numérique).

Mpangi mosi ya ke balulaka mikanda na ndinga Tzeltal tubaka nde: “Kana mono yindula mutindu kisalu yango me salama, mono ke mona mpenza diboko ya Yehowa na kisalu yai. Mono me yituka na kumona kisalu ya me salama. Beto me zaba nde, yo me salama kaka na lusadisu ya mpeve santu ya Yehowa.”

Mpangi Carlos Moreno, mumonisi ya Betele ya Colombie salaka diskure ya kubasika ya Biblia Mbalula ya Nsi-Ntoto ya Mpa ya Masonuku ya Kigreki ya Bukristu (Matayo-Bisalu) na ndinga Wayuunaiki. Bantu kiteso ya 2000 na Colombie mpi na Vénézuéla landaka manaka yango ya bo kotisaka dezia ndinga. Biblia yango kele ntete ya bo lenda tanga na apareyi kansi ya papie ta basika na bilumbu ke kwisa.

Mpangi Christophe Coulot ya Komite ya Filiale ya Côte d’Ivoire salaka diskure ya kubasika ya Biblia—Mbalula ya Nsi-Ntoto ya Mpa na ndinga Baoulé. Bantu kuluta 12 000 landaka manaka yai ya bo kotisaka dezia ndinga. Biblia yango kele ntete ya bo lenda tanga na apareyi kansi ya papie ta basika na octobre 2022. Yai kele mbala ya ntete ya bo ke balula Mbalula ya Nsi-Ntoto ya Mpa na ndinga mosi ya bo ke tubaka na teritware ya Betele ya Côte d’Ivoire.

Mpangi mosi ya ke balulaka mikanda monisaka mambu yina vandaka kupesa bo kikesa ntangu bo vandaka kubalula Biblia na ndinga yai, yandi ke tuba nde: “Ntangu beto vandaka kukutana ti bampasi, beto vandaka kuyindula kiese yina bampangi na beto mpi bantu ya teritware na beto ta wa ntangu bo ta zwa Biblia na ndinga na bo mosi. Kuyindula mambu yai mpi lusadisu ya Yehowa pesaka beto kikesa ya kulanda kusala kisalu.”

Mpangi Peter Bell ya Komite ya Filiale ya Grande-Bretagne salaka diskure ya kubasika ya Biblia Mbalula ya Nsi-Ntoto ya Mpa ya Masonuku ya Kigreki ya Bukristu na ndinga Welsh na Nzo ya Kimfumu mosi na Pays de Galles. Bantu kiteso ya 2 057 landaka manaka yai ntangu yo vandaka kusalama na Banzo ya Kimfumu ya nkaka na Pays de Galles mpi na Argentine. Bo basikaka ntete Biblia ya bo lenda tanga na apareyi. Ya papie ta basika na décembre 2022.

Mpangi mosi ya ke balulaka mpi mikanda tubaka nde: “Mono ta vilana ve mbala ya ntete yina beto balulaka zina ya Yehowa. Yo vandaka dibaku mosi ya mbote ya kuvutula zina ya Nzambi na bisika yina bo katulaka yo.

Mpangi Marcelo Santos ya Komite ya filiale ya Mozambique salaka diskure ya kubasika ya Biblia, mukanda ya Matayo na ndinga Manyawa mpi Tewe na balukutakanu zole yina bo me kotisa ndinga. Bo me tula manaka yango mpi ya video na site na beto JW Stream. Bantu ya nkaka landaka yo na radio mpi na televizio. Bo basisaka mpi ya kuwidikila mpi ya bo lenda tanga na apareyi. Ya papie ta basika na Septembre 2022.

Yai kele mukanda ya ntete ya Biblia ya kuzabana ya bo me balula na ndinga Manyawa mpi mikanda fioti ya Biblia mpamba ya me zabanaka ya bo me balulaka na ndinga Tewe. Bantu yina ta tanga mpi ta widikila Biblia yai ta sepela mingi.

Mpangi Marcelo Moyano, ya Komite ya filiale ya Pérou salaka diskure ya kubasika ya Biblia Mbalula ya Nsi-Ntoto ya Mpa yina bo lenda tanga na apareyi na ndinga Quechua ya Ancash, Quechua ya Ayacucho mpi Quechua ya Cuzco. Yai kele ndinga Quechua ya mitindu tatu ya bo ke tubaka na Pérou. Bantu kuluta 7 000 landaka manaka yai ya bo kotisaka dezia ndinga. Babiblia ya papie ta basika octobre 2022.

Ata ndinga yai kele mosi kansi bo ke tubaka yo ve mutindu mosi na bisika yonso. Yo yina, yo lombaka nde konso kisika ya bo ke tuba ndinga Quechua kuvanda ti bantu ya ke balula yo sambu bantu kubakisa mbote malongi ya Biblia. Na konso kisika ya bo ke tubaka ndinga yai, bantu ya ke balulaka mikanda ke ponaka bangogo yina bantu ke bakisaka mbote na kisika yina bo ke zingaka.

Mpangi Kenneth Cook ya Nto-Kimvuka salaka diskure ya kubasika ya Biblia Mbalula ya Nsi-Ntoto ya Mpa na ndinga ndébélé mpi Sesotho ya Afrique du Sud. Yandi salaka mpi diskure ya kubasika ya Biblia Mbalula ya Nsi-Ntoto ya Mpa ya bo me tomisa na ndinga sesotho ya Lesotho. Bantu kuluta 28 000 landaka manaka yai ya bo kotisaka dezia ndinga na Banzo ya Kimfumu yina bo ponaka mpi na banzo ya bampangi na nsi ya mvimba. Bo basisaka ntete Biblia yina bo lenda tanga na apareyi kansi ya papie ta basika na décembre 2022. Yai kele mbala ya ntete ya bo ke balula Mbalula ya Nsi-Ntoto ya Mpa ya mvimba na ndinga ndébélé mpi sesotho ya Afrique du Sud.

Mpangi mosi ya ke balulaka mikanda tubaka mambu yai sambu na Biblia ya ndinga ndébélé: “Biblia yai kele kibeni lusakumunu sambu na bantu ya ke tubaka ndébélé na teritware na beto sambu yo ke sadila zina ya Yehowa. Sambu na mbala ya ntete, bo ta zaba zina na yandi ntangu bo ta tanga yo na Babiblia na bo.”

Mpangi Shingirai Mapfumo ya Komite ya filiale ya Zimbabwe salaka diskure ya kubasika ya Biblia Mbalula ya Nsi-Ntoto ya Mpa yina bo lenda tanga na apareyi na ndinga ndébélé ya Zimbabwe. Ya papie ta basika na juillet 2022. Bantu kuluta 8 700 landaka manaka yai ya bo kotisaka dezia ndinga na Banzo ya Kimfumu na nsi ya mvimba.

Ata Babiblia ya nkaka kele na ndinga ndébélé ya Zimbabwe, Mbalula ya Nsi-Ntoto ya Mpa ke tendula mbote-mbote bakieleka ya Biblia. Mu mbandu na Yoane 17:3, Babiblia ya nkaka ya ndinga ndébélé ke bingaka Yezu “Nzambi ya kieleka.” Kansi Mbalula ya Nsi-Ntoto ya Mpa ke monisaka pwelele nde Yezu Kristu kele ve Yehowa Nzambi. Mpangi mosi ya ke balulaka mikanda tubaka nde: “Biblia yai ke sadila bangogo ya pete yina bantu lenda bakisa kukonda mpasi.”

Beto ke sepela kumona mutindu Ndinga ya Nzambi ke kumina bantu yonso ya ke sosaka kuzaba kieleka na ntoto ya mvimba mpi yo ke sadisa bo na ‘kubaka masa ya luzingu ya ofele’ na bandinga na bo.—Kusonga 22:17