Na mvula ya kisalu 2020, Bambangi ya Yehowa kutanaka ti bampasi yina me kuminaka bo ntete ve na kisalu yina bo ke salaka na ntoto ya mvimba. Kansi bampasi yango monisaka mpi nde bampangi na beto ya babakala ti ya bankento kele ti lukanu ya kubikala ya kwikama na Yehowa mpi ya kuzinga na bumosi.

Maladi ya Coronavirus yina panzanaka na ntoto ya mvimba kele kibeni na kisina ya mambu ya bampasi yina bantu me kutanaka ntete ve ti yo na ntoto banda bamvula mingi.

Bambangi ya Yehowa yidikaka nswalu mutindu na bo ya kusala mambu ntangu maladi yango panzanaka. Bo kumaka kusala balukutakanu na mutindu ya nkaka, kupesana kikesa na mutindu ya nkaka mpi kulonga nsangu ya mbote na mutindu ya nkaka.

Beno tala mwa ‘bansangu ya mbote’ ya mambu yina salamaka na mvula yina vandaka ve bonso bamvula ya nkaka.—Bingana 15:30.

Na mvula yina ya kisalu, organizasio na beto basisaka Biblia—Mbalula ya Nsi-Ntoto ya Mpa ya mvimba to ya kitini na bandinga 36. Bo tulaka bansiku mingi sambu na maladi ya COVID-19, yo yina Babiblia mingi basikaka na Internet na balukutakanu yina bo vandaka kusala na nzila ya video. Bubu yai, Biblia—Mbalula ya Nsi-Ntoto ya Mpa kele ya mvimba to ya kitini na bandinga 193.

Banda na Marsi 18, 2020, bampangi ya Nto-Kimvuka vandaka kubasisa konso ngonda na jw.org mpi na JW Library bavideo ya mfunu yina vandaka kutubila maladi yai ya me panzana na ntoto ya mvimba.

Na video ya ntete, Mpangi Stephen Lett tubaka nde ata maladi yai ke yangisa bantu, yo ke ndimisa kibeni nde “beto ke zinga na kitini ya nsuka ya bilumbu ya nsuka. Ya kieleka na kitini ya nsuka ya kitini ya nsuka ya bilumbu ya nsuka!”

Ata beto ke zinga na ntangu yai ya mpasi, mpangi Lett tubaka nde: “Bambangi ya Yehowa fwete wa ve boma.”

Konso video vandaka mpi kutubila barapore yina vandaka kupesa kikesa mpi yo vandaka kukatuka na ntoto ya mvimba. Barapore yango monisaka mambote yina bampangi bakaka mutindu bo vandaka kulanda lutwadisu ya Nto-Kimvuka. Na bisika mingi, bamfumu ya leta sikisaka bampangi na beto mutindu bo yidikaka mambu na ntangu ya mbote mpi na mayele yonso ntangu maladi yai yantikaka.

Banda bamvula mingi, bansadi ya Yehowa ya bilumbu na beto vandaka kuvukana konso mvula sambu na kuyibuka Madia ya Nkokila ya Mfumu. Kansi na mvula yai, yo vandaka ve mbote to bamfumu buyisaka bantu na kuvukana kisika mosi. Yo yina yo lombaka nde bampangi mpi mabuta kusosa bo mosi dimpa mpi vinu to bo sala yo bo mosi mpi bo landa na nzila ya video diskure yina bo kotisaka dezia ndinga sambu na Kuyibuka Lufwa ya Yezu.

Na bansi ya nkaka, yo vandaka mpasi sambu bampangi kulanda diskure yango na nzila ya video. Mu mbandu, diambu yai vandaka mpasi na Babetele 11 ya Afrika. Babetele yina yidikaka mambu sambu bampangi kulanda diskure yina na televizio mpi na radio. Mutindu bo yidikaka mambu mpidina salaka nde Bambangi ya Yehowa kuluta 407 000 ya ke longaka nsangu ya mbote kulanda diskure yina, yo vanda bantu mingi ya nkaka ya ke sepelaka ti kieleka.

Nto-Kimvuka pesaka Babetele ya nkaka nzila ya kuyidika mambu sambu bampangi kulanda balukutakanu ya dibundu na televizio mpi na radio kaka mutindu bo landaka diskure ya Nkinsi ya Kuyibuka Lufwa ya Yezu. Yo sadisaka bampangi yina ke zingaka na bansi yina Internet ke vandaka mpasi na kulanda manaka ya balukutakanu ya dibundu ya konso mposo na nzila ya radio mpi ya televizio. Bubu yai, Babetele 23 yo vanda na Afrika, na Eropa, na Amérique du Nord mpi Amérique du Sud ke sadilaka mpi mayele yina.

Maladi yai ya Coronavirus me sala nde bampangi na beto mingi ya babakala mpi ya bankento kumona mpasi mingi sambu na kuzwa madia. Na ntoto ya mvimba, bo ponaka Bakomite kuluta 400 Yina Ke Sadisaka Bampangi Yina Me Bwila Mpasi sambu na kusadisa bampangi yina kele ve ti madia na kisika ya bo ke zingaka. Na mvula ya kisalu 2020, Nto-Kimvuka ndimaka nde bampangi kusadila mbongo badolare kuluta bamilio 18 sambu na kusadisa bampangi kuluta 330 000 na nsungi ya maladi yai.

Yo vandaka mbala ya ntete yina bampangi landaka lukutakanu ya distrike na Internet na nzila ya video. Bampangi ya Nto-Kimvuka mpi bansadisi na bo bantu salaka badiskure yonso ya lukutakanu ya distrike yina bo filimaka mpi bo kotisaka dezia ndinga. Bampangi balulaka bavideo yina na bandinga kuluta 500. Bo tulaka manaka ya lukutakanu ya distrike na jw.org mpi na aplikasio JW Library. Bampangi mpi bantu yina ke sepelaka ti kieleka landaka yo na banzo na bo kukonda nde bo kuditula na kigonsa.

Na bansi mingi, bampangi na beto ya nkaka ya babakala mpi ya bankento ke niokwama sambu na maladi yai ya me panzana na ntoto, katula yo bampangi ke landa mpi kukanga ntima na bantu yina ke telamina beto.

Mvula yai na Russie, basoda me kota na kingolo-ngolo mpi na mutindu yina ke fwa nsiku ya leta na banzo ya nkaka ya bampangi-babakala mpi bankento. Bo me kanga mpi bampangi mingi na kati na bo. Na ntangu yai, bampangi-babakala mpi bankento 42 kele na boloko na Russie mpi zole ya nkaka kele na boloko na Crimée. Banda Tribinale ya Nene ya insi Russie bakaka lukanu na 2017, basoda ya luyalu me kotaka dezia na banzo kuluta 1 000 ya bampangi na beto.

Insi yina bo me tulaka bampangi na beto mingi ya babakala mpi ya bankento na boloko kele Érythrée. Na ntangu yai, bampangi 52 kele na boloko. Na kati na bo, beto lenda tanga mpangi Paulos Eyasu, mpangi Isaac Mogos mpi mpangi Negede Teklemariam. Bampangi yai kele na boloko banda Septembri 17, 1994. Diaka, bampangi-babakala mpi bankento 26 kele na boloko yai bamvula kuluta 10.

Beto ke landa kusamba Yehowa sambu yandi sadisa bampangi na beto yina na kulanda kuvanda kikesa ata bo kele na boloko. Beto me zaba nde bo ke landa kuvanda ya kwikama ata bo kele na mpasi yai.—Kusonga 2:10.

Na nsungi ya mvula ya kisalu yai me katuka kuluta, Bambangi ya Yehowa ya ntoto ya mvimba me monisa nde bo kele bantu ya kwikama: bo salaka kisalu na mitindu ya nkaka kisalu na bo ya kulonga nsangu ya mbote, bo zwaka mitindu ya nkaka ya kupesana kikesa mpi bo zitisaka mbote-mbote bantuma yina bampangi yina ke twadisaka bo (Nto-Kimvuka) pesaka bo. Bo zitisaka mpi bansiku ya bamfumu ya leta.

Mutindu bampangi na beto ya babakala mpi ya bakento salaka mambu yina, bo me monisa nde bo me kangamaka ngolo na Muntu Yina Salaka bo mpi bo ke zolaka yandi mingi. Kwikama yina bo me monisa ta sadisa bo na kukanga ntima na mambu ya nene yina ke kwisa mpi ya ta meka lukwikilu na bo.—Yakobo 1:2, 3.