Kimvuka mosi na zina ya Lagergemeinschaft Dachau yina bantu ya gulukaka na camp yina bo vandaka kupesa bantu bisalu ya ngolo na Dachau salaka ke lomba bamfumu ya Russie na kubika kuniokula Bambangi ya Yehowa. Bo sonikilaka prezida Vladimir Poutine mukanda na Mayi 16, 2021. Kimvuka yai ke bedisa insi Russie mutindu bamfumu ke niokula ngolo kibeni bampangi na beto.

Na mukanda yina, bo sonikaka nde: “Beto ke lutisaka ve ata kilumbu mosi kukonda kuwa nde leta ke niokula Bambangi ya Yehowa. Bantu ya ke tadilaka mambu ya kinsweki ya Russie (services secrets russe), FSB mpi bapolisi ke kota na banzo ya bantu ya dibundu yai mpi bo ke bebisa bima. Bo ke niokula Bambangi ya Yehowa mpi ke pesa bo mpasi. Bo ke zengila babakala mpi bankento boloko ya bamvula mingi. Kana bo me lomba nde bo yidika mambu sambu kisika yina bo ke tula bo kuvanda mbote to kana bo me lomba nde bo futa mbongo mpi bo basisa bo na boloko, tribinale ke buya.”

Na nsuka ya mukanda, bo tubaka nde: “Beto ke lomba nge sesepi na kubika nde konso muntu ya Fédération de Russie kusambila na dibundu yina yandi me zola sambu yo kele nswa yina kele na bansiku ya ke twadisaka Russie. Pardon, manisa kukonda lunungu yai.”

Na Mayi 2021, bo kangaka Bambangi ya Yehowa 61 na insi Russie sambu na lukwikilu na bo. Minunu vandaka na kati na bo, mu mbandu mpangi-nkento Valentina Baranovskaïa. Yandi kele ti bamvula 70. Bo zengilaka yandi boloko ya bamvula zole. Yandi belaka na Yuli 2020. Butomfu na yandi belaka (attaque cérébrale). Yandi ti mwana na yandi ya bakala Roman Baranovski lombaka nde tribinale kutadila diaka lukanu yina bo bakaka. Kansi na Mayi 24, 2021, tribinale mosi buyaka kutadila yo diaka. Bo zengilaka mwana na yandi boloko ya bamvula sambanu.

Beto ke baka na valere mambu yina bantu ya ntima ya mbote yina ke mona mutindu bo ke niokula bampangi na beto ya babakala mpi ya bankento na insi Russie ke tuba mpi ya bo ke lomba nde mambu ya mutindu yina kusuka. Beto me zaba nde nsuka-nsuka, Yehowa ta gulusa bansadi na yandi.—Daniele 12:1.