Minunu lenda baka maladi ya yai coronavirus kukonda mpasi, yo yina bampangi na beto ya babakala mpi ya bankento ya me kuma bambuta mingi ke lemfuka na bansiku yina bamfumu ya leta ke pesa mpi ke basika ve na banzo na bo. Kansi, bo kele ve bo mosi, mpi bo ke landa kusala mambu yina bo fwete sala. Bo ke sadila mayele ya teknolozi sambu na kulonga nsangu ya mbote mpi kulanda balukutakanu.

Na Rome, na insi Italie, mpangi-nkento mosi ya bamvula 94, yina bakaka mbotika na 1952 ke vandaka kaka na nzo na yandi sambu sante na yandi ke vandaka diaka ve mbote nkutu na ntwala nde maladi yai kupanzana. Ata yandi ke landaka balukutakanu na nzila ya Internet (JW Stream), yandi ke kwendaka ve na balukutakanu ya dibundu na bo banda mwa bilumbu. Kansi awa ya bankuluntu ya dibundu na bo me yidika mambu sambu bampangi kulanda balukutakanu ya dibundu na nzila ya video (vidéoconférence), yandi me kuma kumona bampangi yonso ya dibundu na bo mpi kulanda balukutakanu ya dibundu na bo.

Na Spanish Fork, Utah, na États-Unis, mpangi-nkento Stephanie Aitken kele kifwa-makutu. Yandi ke zingaka na nzo yina bo ke sansaka minunu mpi na nzo yango, bo me buyisa bantu na kukwenda kutala minunu. Nkuluntu mosi ti nkento na yandi sadisaka mpangi-nkento yai na kutula programe mosi ya video na apareyi (tablette) na yandi. Bo vandaka na nima ya vitre ya porte ya nzo yango mpi bo vandaka kusonga yandi mambu yina yandi fwete sala sambu programe yango kukota na apareyi na yandi. Ntangu mpangi-nkento Aitken monaka nde programe yina me kota na apareyi na yandi, yandi waka kiese mingi mpi yambaka apareyi na yandi. Yandi kele na kiese sambu yandi lenda solula ti bampangi ya dibundu na yandi.

Awa ya bampangi na beto na ntoto ya mvimba, yo vanda bayina me kuma minunu, ke sadila teknolozi sambu na kuyikama na mambu ya mpasi yina maladi yai me nata, beto ke yibuka lusilu ya Yehowa yina ke tuba nde bansadi na yandi ta sadila “miliki ya makanda.” (Yezaya 60:16) Beto me zaba nde yandi ta kumaka yonso yina bansadi na yandi awa na ntoto kele ti yo mfunu na ntangu ya mpasi.