Lukutakanu ya Distrike ya 2020 ya vandaka ti ntu-diambu, “Beno Vanda Ntangu Yonso na Kiese”! salamaka na mutindu yina Bambangi ya Yehowa me salaka ntete ve lukutakanu ya distrike. Bampangi yina ke salaka kisalu ya kubalula mikanda mpi bavideo (traduction), balulaka badiskure na bandinga kuluta 500 mpi bantu mingi landaka yo na nzila ya video. Bampangi yai kutanaka ti bampasi mingi na kisalu na bo, mu mbandu bo vandaka ve ti bisadilu mingi mpi ntangu ya kusala kisalu yango vandaka fioti.

Na insi Kenya, mpangi-nkento mosi ya ke salaka kisalu ya kubalula mikanda mpi bavideo na ndinga Kikuyu tubaka nde: “Mutindu bantu vandaka ve kukota na Betele, bampangi ya kusadila sambu na kukotisa ndinga na bavideo vandaka fioti. Beto kotisaka ndinga ya bampangi-babakala mpi bampangi-bankento na kintama. Beto vandaka na kiese ya kumona mutindu mpeve ya Yehowa salaka kisalu.”

Bampangi ya ke balulaka mikanda mpi bavideo na ndinga ya Coré mpi na Ndinga ya Bidimbu ya Coré kutanaka mpi ti bampasi ya mutindu mosi. Bampangi yina ke sadisaka na kintama bampangi ya ke salaka kisalu ya kubalula mikanda mpi bavideo na bandinga yai lendaka ve kukwisa na Betele sambu na kusadisa bo.

Sambu na kununga mpasi yai, bampangi yango salaka bastidio na banzo na bo. Bampangi ya mabundu pesaka bisadilu mingi yina yo lombaka sambu na kusala kisalu yai. Sambu balukutakanu ya nziunga salamaka ve, Betele bakaka lukanu ya kusadila bakamera ya Banzo ya Balukutakanu ya Nene sambu na ku filmer manaka na ndinga ya bidimbu.

Na insi Vénézuéla, bampangi yina ke balulaka mikanda mpi bavideo vandaka na mpasi ya kusala kisalu yai sambu Internet vandaka ve mbote. Bampangi ya nkaka vandaka ve ti bisadilu ya kulunga. Bampangi yai sadilaka mayele na bo mpi bisadilu yonso yina bo vandaka ti yo sambu na kusala kisalu yai ata bisadilu yango vandaka ve ya kulunga. Na bisika ya nkaka, bampangi sadilaka bamatela sambu yo sadisa bo na kukotisa ndinga mbote kukonda makelele.

Na mbanza Djouba, na insi Soudan du Sud, kele ti ekipe ya bampangi ya ke balulaka bavideo mpi mikanda na ndinga Zandé. Mpangi mosi ya ke salaka mpi kisalu yai tubaka nde: “Ntangu bo songaka beto nde beto ta balula badiskure ya lukutakanu ya distrike ya mvimba, mono kuditubilaka nde: ‘Yo lenda salama ve ata fioti! Beto ta kuka ve kumanisa na kukotisa ndinga ya bavideo kuluta 90 na bangonda zole mpamba.’ Bubu yai ya beto me manisa kisalu yai, mono ke ndima mpenza nde ata kima mosi ve lenda kanga Yehowa nzila ya kulungisa luzolo na yandi. Mutindu na yandi ya kusala mambu ke yitukisa mpenza!”—Matayo 19:26.

Lukutakanu ya Distrike ya 2020 ya vandaka ti ntu-diambu, “Beno Vanda Ntangu Yonso na Kiese”! vandaka kibeni dikabu ya Yehowa “yina ke zola nde bantu ya mitindu yonso kuguluka mpi kubaka nzayilu ya sikisiki ya kieleka.”—1 Timoteo 2:4.