Na ngonda ya Yuli mpi ya Augusti 2020, bampangi mingi kibeni ya babakala ti ya bankento mpi bantu mingi ya nkaka landaka lukutakanu ya distrike ya 2020 kaka na ntangu mosi.

Beto vandaka kuvingila ti nzala ya ngolo lukutakanu ya distrike yai ya vandaka ti ntu-diambu, “Beno Vanda Ntangu Yonso na Kiese”! yina beto zolaka kusala na Banzo ya Balukutakanu ya Nene, na ba stade mpi na bisika ya nkaka ya kufutila na bansi 240. Sambu na kutanina sante ya bantu yina zolaka kukwenda na lukutakanu yai, Nto-Kimvuka bakaka lukanu ya kusadisa lukutakanu yai na nzila ya video na ntoto ya mvimba. Yai mbala ya ntete banda na 1897 yina organizasio na beto me vukisa ve bantu mingi na bisika ya mutindu na mutindu sambu na kusala balukutakanu ya distrike.

Mpangi Kenneth Cook ya Nto-Kimvuka ke tuba nde: “Ntangu beto tubaka nde beto ta sala ve balukutakanu ya distrike mutindu beto ke salaka yo dezia, lukanu na beto vandaka ya kusadisa lukutakanu mosi na ntoto ya mvimba yina bantu yonso ta landa na ntangu mosi. Beto zabaka nde yo vandaka kulomba bangonda iya to na nsi sambu na kubalula badiskure ya lukutakanu yai. Na kutuba ya masonga, yo ke lombaka mvula mosi to mingi sambu kuyidika mpi kumanisa kisalu ya mutindu yai. Beto waka kiese mingi kibeni ntangu kitini ya ntete ya lukutakanu yai manaka na Yuli 6, 2020 na bandinga kiteso ya 400. Beto yidikaka mambu sambu na kubalula lukutakanu yai na bandinga 511!”

Mpangi-nkento mosi ya ke sansaka bana na yandi tatu yandi mosi, ke tuba mambu yai sambu na lukutakanu yai ya distrike ya beto landaka na nzila ya video: “Bana na mono sepelaka mingi kibeni ata beto vandaka ve ti dibaku ya kuvukana ti bampangi ya nkaka. Kulanda lukutakanu yai bitini-bitini sadisaka bo kibeni na kutula dikebi na malongi. Ntangu bo vandaka na mfunu ya kupema, beto vandaka kukanga fioti video ya lukutakanu yango. Muntu mosi ve kondaka kulanda lukutakanu yina ata munuta mosi. Kitini ya Kitanu ya lukutakanu yai monisaka nde bana kele bonso batolo-tolo yina beto fwete ta mbote sambu bo vanda ti luzingu ya kiese na kisalu ya Yehowa. Lukutakanu yai ya distrike na nzila ya video me sadisa mono mpenza na kusala mambu yai.”—Nkunga 127:4.

Lukutakanu yai ya distrike na nzila ya video me salama na mutindu mosi ya me salamaka ntete ve. Yo me benda dikebi ya bantu ya ke pesaka bansangu (journalistes) na ntoto ya mvimba. Mu mbandu Robert Hendriks, yina ke twadisaka bisalu ya Biro ya Ke Talaka Mambu ya Kupesa Bansangu na États-Unis, tubaka mambu yai: “Bantu mingi ya ke pesaka bansangu me sonika masolo ya ke tubila lukutakanu yai ya distrike na nzila ya video. Bo ke tuba nde organizasio na beto me sadila mbote mayele ya teknolozi sambu na kusonga lukutakanu yai na nzila ya video mpi sambu na kutanina mpenza sante ya bantu yonso.”

Lukutakanu yai ya distrike ya 2020 ya vandaka ti ntu-diambu, “Beno Vanda Ntangu Yonso na Kiese”! me pesa beto diaka kiese mingi ya kumona mitindu ya nkaka yina Yehowa ke monisa nde yandi kele Longi na beto ya Nene.—Yezaya 30:20.