Bambangi ya Yehowa mingi mpi bantu yina ke sepelaka ti malongi ya Biblia ta vukana na Kizole Aprili 7, 2020, sambu na kusala nkinsi mosi ya mfunu mingi kuluta ya ke salamaka konso mvula, disongidila nkinsi ya Kuyibuka lufwa ya Yezu. Kansi mvula yai, maladi ya bo ke binga COVID-19 ta sala nde beto sala nkinsi yina mutindu ya nkaka. Bantu mingi na ntoto ya mvimba ta vukana na nzila ya mayele mosi ya teknolozi yina bo ke bingaka vidéoconférence.

Na bansi mingi, bamfumu ya leta ke buyisa nde bantu mingi kuvanda kisika mosi sambu na maladi ya Coronavirus. Yo yina, mabundu mingi na nsi-ntoto ke sadila mayele ya teknolozi yina bo ke bingaka vidéoconférence sambu na kusala balukutakanu ya kati-kati ya mposo. Mabundu yina ta sadila mpi mayele yina sambu na kusala nkinsi ya Kuyibuka lufwa ya Yezu. Bo ta tula na jw.org diskure ya manaka yai ya bo me kotisaka dezia ndinga sambu bantu yonso ya nkaka kulanda yo mpi.

Bantu kuluta bamilio ya 20 vukanaka sambu na Kuyibuka lufwa ya Yezu na mvula ya me katuka kuluta. Beto ke tula mpi ntima nde bamilio ya bantu ta vukana na nkinsi yai na nzila ya vidéoconférence, na telefone to ta tala na jw.org diskure yina bo me kotisaka dezia ndinga.

Na bansi mingi, maladi yai ke landa na kupanzana mpi bantu mingi kele na kigonsa. Sambu na kutanina bampangi na beto, yo ke lomba nde beto landa kuzitisa na dikebi yonso mambu yina bamfumu ya leta ke tuba tii kuna maladi yai ta mana. Kansi beto ke tula ntima nde Yehowa ta sadisa beto mpi lukanu na beto kele ya kuzitisa nsiku ya Yezu ya kulanda kusala nkinsi yina sambu na kuyibuka yandi.—Luka 22:19.