Na 2020, beto Yibukaka Lufwa ya Yezu na mutindu yina beto me salaka yo ntete ve. Sambu na mbala ya ntete, beto landaka diskure ya Kuyibuka Lufwa ya Yezu na televizio mpi na radio na bandinga mingi na bansi mingi ya Afrika.

Diambu yai sadisaka bansamuni kuluta 407000 na kulanda diskure yai; yo sadisaka mpi bantu mingi kibeni yina sepelaka kulanda yo. Ata beto ke zaba ve ntalu ya bantu yina landaka diskure yai, yo lutaka na radio mpi na televizio na bisika yina bantu kuluta 150 milio ke zingaka.

Sambu na maladi yai ya COVID-19, bantu mingi na ntoto ya mvimba landaka diskure ya Kuyibuka Lufwa ya Yezu na nzila ya video. Kansi bansamuni mingi na Afrika ke zingaka na bisika yina yo ke lombaka mbongo mingi sambu na kusadila Internet to kubinga na telefone mpi bo ke kukaka ve kutala to kubaka bavideo na Internet. Yo yina Nto-Kimvuka pesaka nswa na Babetele ya nkaka sambu bo wakana ti bantu yina ke twadisaka baradio mpi batelevizio na bansi na bo sambu bo tula diskure ya Kuyibuka Lufwa ya Yezu na batelevizio mpi na baradio ya babwala na bo mpi ya bansi na bo. Yo salaka nde, bampangi yina ke zingaka na teritware ya Babetele yango kulanda diskure ya Kuyibuka Lufwa ya Yezu kukonda kubasisa mbongo mingi.

Na ntwala ya Kuyibuka Lufwa ya Yezu, Babetele 11—ya Angola, ya Bénin, ya Cameroun, ya Côte d’Ivoire, ya République Démocratique du Congo, ya Ghana, ya Malawi, ya Mozambique, ya Sénégal, ya Zambie mpi ya Zimbabwe—solulaka ti bantwadisi ya baradio mpi ya batelevizio mpi bo wakanaka sambu na kutula diskure ya Kuyibuka Lufwa ya Yezu sambu bantu yonso kulanda yo na baradio mpi na batelevizio na bisika kuluta 36, na bansi 16.

Angola

Bantwadisi ya baradio sambanu ndimaka kutula diskure ya Kuyibuka Lufwa ya Yezu na bandinga sambanu: Ibinda, Kikongo, Kimbundu, Nyaneka, Kiportige mpi Umbundu. Bo tulaka diskure yina na baradio ya bisika ya nkaka yina bantu ke vandaka mingi na nsi yina.

République Démocratique du Congo

Longoki mosi ya Biblia ya nkento yilamaka sambu na kulanda diskure ya Kuyibuka Lufwa ya Yezu yandi mosi sambu dibuta na bo vandaka ve kuzola Bambangi ya Yehowa. Kansi, na ntangu yandi vandaka kuyilama sambu na kulanda diskure yango, papa na yandi bingaka yandi na salon mpi songaka yandi nde: “Diskure yango me yantika!” Ntangu yandi kwendaka na salon, yandi yitukaka na kumona dibuta na bo ya mvimba me vanda mpi ke tala diskure ya Kuyibuka Lufwa ya Yezu na televizio. Bantu 10 ya dibuta na bo talaka diskure ya Kuyibuka Lufwa ya Yezu.

Na bwala mosi ya kele pene-pene ti bwala Luena, muntu mosi ya kele ve Mbangi ya Yehowa tubaka nde: “Bapastere na beto me sala ve ata kima. Kansi beno, beno ke landa kusambila Nzambi na beno ata na ntangu yai ya maladi ya COVID-19. Beto ta landa diskure yina ti beno!”

Ghana

Bantwadisi ya televizio mosi ya insi yai ndimaka kutula diskure ya Kuyibuka Lufwa ya Yezu na ndinga Twi. Nkutu, televizio yina lutisaka luzayisu mosi sambu na kubingisa bantu na kulanda diskure yango. Katula diskure ya Kuyibuka Lufwa ya Yezu, televizio yina songaka mpi video Sambu na nki Yezu fwaka? mpi video Sambu na Nki Nzambi Me Pesaka Nzila na Bampasi?, bo songaka mpi video ya bankunga yai: Nsi-Ntoto ya Mpa mpi Yo Vandaka Pene-Pene.

Sénégal

Mpangi-nkento mosi tubaka nde: “Bantu lendaka kulonguka mambu ya Yehowa na televizio mpi na radio. Yo ke yitukisa! Beto me baka mambote mingi mpi beto kele na kiese. Beto kele kibeni na kiese sambu Yehowa kele Nzambi na beto!”

Mpangi-nkento ya nkaka tubaka nde: “Ntangu mono waka nde bo ta songa diskure ya Kuyibuka Lufwa ya Yezu na televizio, mono tubaka na nsi ya ntima nde: ‘Beto salaka ve kampanie ya kubingisa bantu sambu na COVID-19.’ Kansi, mutindu bo ta tula yo na televizio, bantu mingi ta landa diskure yina ya Kuyibuka Lufwa ya Yezu. Yo yina mono bingaka nswalu bantu yina mono ke longukaka ti bo Biblia, bantu yina mono vutukilaka mpi bantu yonso yina mono me zaba ya kele ve Bambangi ya Yehowa mpi mono songaka bo nde bo ta tula diskure yina na televizio. Balongoki na mono uvwa ya Biblia mpi bantu ya mabuta na bo landaka diskure yina. Kisoni na mono mosi landaka diskure yina na Ziguinchor mpi yandi yulaka mono kana beto lenda tubila diaka mambu mingi sambu na yo, mono ndimaka na kiese yonso.”

Mutindu bo tulaka diskure yai na televizio mpi na radio ke monisa diaka nde Yehowa “lenda sala mambu yonso.”—Matayo 19:26.