APRILI 10, 2020
BANSANGU YA NTOTO YA MVIMBA
Nkinsi ya Kuyibuka Lufwa ya Yezu na 2020 na Betele ya États-Unis
Na Aprili 7, 2020 na ntangu maladi ya coronavirus kumaka kibeni ngolo, Bambangi ya Yehowa ya ntoto ya mvimba salaka nkinsi ya Kuyibuka Lufwa ya Yezu Kristu. Mpangi Stephen Lett ya Nto-Kimvuka tubaka nde: “Na ntoto ya mvimba, ata maladi mosi ve lenda kanga beto nzila sambu na kumonisa ntonda na mambu yina Yehowa mpi Yezu salaka sambu na beto to kulembisa lukanu na beto ya kusungimina Madia ya Nkokila ya Mfumu.” Inki mutindu nkinsi yango salamaka mvula yai?
Yai kele disolo ya ntete na kati ya masolo ya kulandana yina ta basikaka na kitini Bansangu sambu na kutubila mutindu bampangi na beto ya ntoto ya mvimba salaka nkinsi ya Kuyibuka Lufwa ya Yezu na ntangu yina maladi ya coronavirus panzanaka na ntoto ya mvimba. Na disolo yai ya ntete, beto ta tubila mutindu Bambangi ya Yehowa yina kele na babiro ya ke twadisaka kisalu na ntoto ya mvimba mpi bayina kele na Betele ya États-Unis salaka nkinsi yango.
Sambu na kulemfuka na bansiku yina bamfumu ya leta pesaka nde bantu mingi kuvukana ve kisika mosi, Nto-Kimvuka bakaka lukanu nde bampangi yonso ya ke sadilaka Yehowa na Betele ya États-Unis kulanda bo yonso diskure mosi kaka. Diskure yango salamaka na nzo ya nene yina bo ke salaka balukutakanu na Warwick. Mpangi Anthony Morris muntu salaka diskure yango. Bampangi yonso ya Betele ya États-Unis landaka diskure yango na bashambre na bo. Ata bampangi yina ke diaka dimpa mpi ke nwaka vinu vandaka fioti mpamba, Biro Yina Ke Twadisaka Mambu na Betele tulaka mampa mpi vinu mingi sambu na bantu yonso.
Mampa ti vinu yina bampangi ya Betele lenda nata na bashambre na bo
Bampangi ya ke sadilaka Yehowa na Betele lendaka mpi kulanda diskure yina na mabundu na bo na nzila ya video. Diaka, bo pesaka bampangi ya Betele yina kele bankuluntu nswa ya kusala diskure yina na nzila ya video (vidéoconférence).
Bakala mosi ti nkento na yandi ke sadilaka Yehowa na Betele ya Wallkill, bo ke yibuka Lufwa ya Yezu na shambre na bo na Betele
Bampangi mingi ya Betele tubaka nde nkinsi ya Kuyibuka Lufwa ya Yezu ya ture yai vandaka nkinsi ya Kuyibuka Lufwa ya Yezu yina bo me salaka ntete ve. Ata bo vandaka ve kisika mosi ti bampangi ya nkaka, bo kudiwaka nde bo kele na kimvuka ti bampangi na bo ya babakala mpi ya bankento na ntoto ya mvimba ntangu bo vandaka kuyibuka mambu zole ya nene yina Yehowa Nzambi mpi Yezu Kristu salaka.—Yoane 3:16; Matayo 20:28.
