Nto-Kimvuka ya Bambangi ya Yehowa pesaka luzayisu nde bo me pona bafiliale na kuvukana na manaka ya kumeka kuvutukila balukutakanu na Nzo ya Kimfumu. Bafiliale yango ta pona Banzo ya Kimfumu na bisika yina bantu mingi me baka mangwele mpi bantu ya ke bela coronavirus kele fioti. Ya kieleka, bampangi ta sala mambu yai yonso na kulanda bansiku ya bamfumu ya Leta ya ke tadila kusala balukutakanu na kati ya nzo. Bo tangaka luzayisu yai na mabuta ya Betele ya ntoto ya mvimba na Kitanu, le 15 octobre 2021.

Mambu ya beto ta mona na nima ya kumeka manaka yai ta sadisa beto na kubaka lukanu ya kupesa mabundu ya nkaka nswa ya kuvutukila kusala balukutakanu na Nzo ya Kimfumu. Bo tubaka mpi na luzayisu yango nde beto ta vingila ntete tii na le 1 janvier 2022 na ntwala ya kuvutukila bisalu ya beto ke salaka na bisika ya bantu mingi.

Beto ke sepela mingi ti mutindu Nto-Kimvuka ke keba bampangi ya ntoto ya mvimba mpi mutindu bo ke vutula malembe-malembe bisalu ya organizasio na beto. Beno samba Yehowa sambu yandi landa kutwadisa mpi kusakumuna mambu yai.—Bingana 14:16.