Bitini zole ya ntete ya ndonga yai ya masolo tubilaka mingi mutindu bo ke sadila site Internet jw.org sambu na kukabula mikanda mpi bavideo ya bo lenda sadila na ba-apareyi mpi sambu na kupesa bansangu ya mbote ya me tala bampangi na beto ya bankento mpi ya babakala ya ntoto ya mvimba. Kitini ya nsuka ya ndonga yai ya masolo ta monisa mutindu site jw.org ke sala nde kisalu ya kulonga nsangu ya mbote na ntoto ya mvimba kukwenda na ntwala.

Bandinga: Ntangu bo yidikaka diaka site yai mpi bo basisaka yo ya mpa na août 2012, lutiti ya luyantiku (page d’accueil) vandaka na bandinga 139. Na août 2014, mvula yina kampanie ya kukabula trakiti ya sadisaka bantu na kuzaba site na beto, ntalu ya bandinga yina bo balulaka lutiti yango ya luyantiku lutaka 500. Na kati ya ntalu yai, 22 kele bandinga ya bidimbu. Bubu yai, site na beto kele ti mikanda na bandinga kuluta 1 700. Na kati yo, bandinga ya bidimbu kele kuluta 100.

Masolo na Ntangu ya Me Fwana: Na octobre 2019, bo yidikaka lutiti ya luyantiku ya jw.org sambu yo yantika kubasisa disolo mosi ya bo ke tubila ti kifwanisu mpi masolo tatu ya bo me pona. Kusala nde lutiti ya luyantiku kumonika mutindu yina ke sadisa na kumona bima ya kele na site mpi ya kele mfunu sambu na kisalu ya kulonga nsangu ya mbote. Na nima, departema ya ke talaka kisalu ya kusonika mpi ya bifwanisu me sadilaka mayele mosi ya ke salaka nde masolo yina bo ke tubilaka mpi bifwanisu kubasika nzila mosi mpi yo sukinina ve. Yo yina, bantu-diambu ya masolo yina ke vandaka na lutiti ya luyantiku ke wakanaka ntangu yonso ti mambu yina bantu ke tubila mingi. Mu mbandu, lutiti ya luyantiku tubilaka masolo ya me tala maladi ya Covid-19 yina panzanaka na ntoto ya mvimba, bitumba yina ke salama na kati ya Russie ti Ukraine mpi mutindu bantu ke tina na babwala ya nkaka sambu na bitumba yango.

Site ya Ke Sadisa Bantu na Kuzwa Bansangu ya Me Tala Beto: Site jw.org ke sadisa bantu yina ke zola kuzaba beto na kuzwa bansangu ya masonga na yina me tala organizasio na beto mpi mambu ya beto ke salaka. Diaka, site yango ke sadisa bantu yina ke zola kuzaba mambu mingi na kusolula ti Mbangi mosi ya Yehowa. Nkento mosi ya kele kifwa-makutu longukaka Biblia ti Bambangi ya Yehowa ntangu yandi vandaka ntete na nzo-nkanda. Kansi na ntangu yandi kumaka kuzinga kisika ya nkaka, yandi vandaka kumona bo diaka ve. Yandi vandaka kuzola kuvutukila kulonguka Biblia, kansi ata Mbangi mosi ve ya Yehowa vandaka kukwenda na nzo na yandi. Yo yina yandi yibukaka nde site jw.org kele mpi yandi fulusaka formilere na Internet sambu na kulomba nde Mbangi mosi ya Yehowa kukwenda kutala yandi. Na nima ya bilumbu fioti mpamba, Bambangi zole ya Yehowa ya ke longaka mingi kibeni nsangu ya mbote (bapasudi-nzila ya nene) kwendaka na nzo na yandi. Yandi vutukilaka kulonguka Biblia mpi yandi yantikaka kukwenda na balukutakanu ya dibundu. Bubu yai, yandi me bakaka mbotika mpi yandi ke longaka bana na yandi tatu Biblia sambu bo zaba Yehowa. Yandi ke tuba nde: “Mono ke pesa Yehowa mersi sambu na site Internet yai sambu kana mono zwaka ve mpila ya kufulusa formilere na Internet, mono zolaka kuvingila tii ntangu mono zolaka kukutana na kidiba ti Mbangi mosi ya Yehowa.”

Beto ke landa kulonga bantu mingi kibeni nsangu ya mbote. Yo yina, yo ke pesa beto kikesa na kuzaba nde organizasio ya Yehowa ta landa kubasisa bisadilu ya me fwana sambu kisalu ya kulonga bantu kukwenda kaka na ntwala.—Yezaya 60:22.

• Bavideo yina bantu ke bakaka konso ngonda na site

• Bantu yina ke kotaka konso kilumbu na site, konso ngonda

• Kubasika ya logo jw.org ya me zabanaka, mars 2013

• Site na ndinga ya bidimbu, juillet 2014

• Bo me yidikaka mutindu lutiti ya luyantiku fwete monikaka sambu na kubenda dikebi ya bantu mingi, janvier 2019

• Kubasika ya mukanda Zinga Mvula na Mvula! janvier 2021