Bampangi kiteso ya 3 000 ke ta kimbangi na kisika ya bantu kele mingi na dibaku mosi ya mfunu na kisika yina bo ke zola kusala nsaka ya kubaka ntinu (jeux américains et jeux parapanaméricains) na Lima (Pérou). Nsaka yango yantikaka na 26 Yuli, 2019 mpi yo sukaka na 1 Septembri 2019. Bantu kuluta 8 500 vandaka kusala nsaka yango mpi bantu kiteso ya 250 000 kwisaka kutala yo.

Bampangi sadilaka bashario 100 na bisika 53 ya kuswaswana sambu na kulonga bantu yina kwisaka kutala nsaka yango. Bo sadilaka mikanda na ndinga ya Aymara, Kingelesi, Kifalansa, Kiportige, Quechua (Ayacucho) mpi Kiespaniole. Na bisadilu yina bo sadilaka na bashario, bampangi vandaka mpi kusonga bavideo na Ndinga-Bidimbu ya Pérou sambu na bifwa-makutu mpi bantu yina ke waka ve mbote.

Mpangi Kemps Moran Hurtado yina vandaka ntwadisi ya Kampanie yango tubaka nde: “Ngidika yai sadisaka beto na kusolula ti bantu mingi ya me katuka na bisika ya kuswaswana mpi ya kele ti bikalulu ya kuswaswana sambu bantu ya bansi mingi kwisaka kutala nsaka yango. Mutindu ya nkaka ya mfunu ya kulonga bantu nsangu ya mbote kele kuta kimbangi na kisika ya bantu mingi sambu yo ke sadisaka bantu na kumona mutindu bambangi ya Yehowa ke longaka na bisika yina bantu kele mingi.”

Beto ke vandaka na kiese na kumona mutindu kisalu ya kusamuna ke kwenda na ntwala. Beto ke tula ntima nde Yehowa ta landa kusakumuna kisalu ya bampangi na beto na Pérou mutindu bo ke landa kusamuna na konso kisika yina bo lenda zwa bantu.—Bisalu 17:17.