Na Yuni 20, 2021, Biblia—Mbalula ya Nsi-Ntoto ya Mpa basikaka na ndinga Bicol na format yina beto ke sadilaka na baapareyi. Mpangi Denton Hopkinson ya Komite ya Filiale ya insi Philippines salaka diskure ya kubasika ya Biblia yai mpi bansamuni ya mabundu kiteso ya 97 landaka na nzila ya video, manaka yai.

• Bantu kiteso ya bamilio 5, 8 ke tubaka ndinga Bicol. Bo ke zingaka na baprovense yai 5 ya insi Philippines: Albay, Camarines du Nord, Camarines du Sud, Catanduanes mpi Sorsogon.

• Yo kele ndinga ya tanu yina ke tubamaka mingi na insi Philippines

• Bampangi ya ke longaka nsangu ya mbote (bansamuni) kuluta 5 800 ke sadilaka Yehowa na mabundu ya ke salaka balukutakanu na ndinga Bicol

• Sambu na kumanisa kubalula Biblia yai, yo lombaka bamvula nsambwadi ti bangonda sambanu mpi baekipe zole ya bampangi yina ke salaka kisalu ya kubalula mikanda

Mpangi mosi yina ke salaka kisalu ya kubalula mikanda na ndinga Bicol tubaka nde: “Yo lombaka nde beto sala bikesa ya mingi sambu na kusadila bangogo ya pete yina bantu mingi ya ke tubaka ndinga Bicol lenda bakisa kukonda mpasi sambu ndinga Bicol me vukanaka ti tu-bandinga ya nkaka na kati.”

Mpangi ya nkaka yina ke salaka mpi kisalu ya kubalula mikanda na ndinga Bicol ke tuba nde: “Beto ke ndima nde Biblia yai ya ke sadila bangogo ya pete mpi yina bantu ke sadilaka na bilumbu yai na ndinga Bicol ta sadisa bantu ya ke tubaka ndinga yai na kubakisa mbote-mbote mambu ya kele na kati ya Biblia yango.”

Na Philippines, Biblia—Mbalula ya Nsi-Ntoto ya Mpa me basikaka dezia ya mvimba na bandinga yai sambanu: Cebuano, Hiligaynon, Iloko, Pangasinan, Tagalog mpi Waray-Waray.

Beto kele na kiese kumosi ti bampangi na beto ya ke tubaka ndinga Bicol sambu na kubasika ya Biblia yai. Beto ke ndima nde yo ta sadisa bantu mingi na kukumisa Yehowa mpi na kubaka ‘luzingu ya mvula na mvula.’—Nkunga 22:26.