Na Yuli 27, 2019, kunikana ya ntoto salamaka mbala zole na kisanga ya Itbayat na Philippines, kiteso ya bakilometre 690 na ndambu ya nordi ya Manila. kunikana ya ntoto yina vandaka ngolo kibeni, yo fwaka bantu 9, bantu 64 lwalaka mpi yo bebisaka banzo 266. Bamfumu ya Leta monisaka nde bantu 2 968 kutanaka ti bampasi ya kunikana ya ntoto yina.

Ata mbangi mosi ve ya Yehowa fwaka na kunikana ya ntoto yina. Ata mpidina, mpangi-nkento mosi lwalaka mputa ya fioti mpi banzo zole ya bampangi na beto bebaka kibeni.

Betele tulaka Komite ya Ke Pesaka Lusadisu na Bantu Yina Me Bwila Mpasi mpi bampangi ya Komite yango sadisaka na kusumba mpi kukabisa bima ya mfunu, mu mbandu madia mpi masa. Betele tindaka bampangi sambu na kusadisa mpi kupesa bampangi yai ya kutanaka ti bampasi kikesa.

Beto ke samba sambu na bampangi na beto yai ya me katuka kukutana ti bampasi ya kunikana ya ntoto yina me katuka kusalama ntama mingi ve. Beto ke ndima nde Yehowa, “Nzambi yina ke lembikaka bantu yonso,” ta landa kulungisa bampusa ya bampangi na beto.—2 Bakorinto 1:3.