Na ntangu yai ya maladi ya coronavirus me panzana na ntoto ya mvimba, bampangi na beto ya babakala mpi ya bankento ya ke zingaka na babwala ya nkaka na République démocratique du Congo mpi na République du Congo ke mona mpasi sambu masa ke kotila bo na banzo mpi bimvuka ya bantu yina ke kolama ke landa kunwana ti minduki (conflits armés). Betele ya Congo Kinshasa yina ke talaka kisalu ya kulonga bantu nsangu ya mbote na bansi yina zole (Congo Kinshasa mpi Congo Brazzaville) ke sala yonso yina yo lenda sala sambu na kusadisa bampangi na kimpeve mpi na kinsuni. Betele me yidika na teritware na yo ya mvimba Bakomite 57 Yina Ke Pesaka Bantu Lusadisu na Ntangu ya Mpasi sambu na kusadisa bampangi. Bilumbu yai, bampangi-babakala mpi bampangi-bankento kuluta 90000 me baka bima ya kudia.

Na kilumbu ya Kiya mpi ya Kitanu Aprili 17 mpi 18, 2020, bamvula ya ngolo nokaka na provense yina kele na ndambu ya esti ya République démocratique du Congo. Yo salaka nde bampangi 139 kuyambula banzo na bo mpi bo kele ntangu yai na banzo ya bampangi ya nkaka yina ke sambilaka ti bo. Bampangi ya Bakomite Yina Ke Pesaka Bantu Lusadisu na Ntangu ya Mpasi ya kele na ndambu yina ya insi ke sala yonso sambu na kusosila bampangi yai banzo yina bo lenda vanda sambu na mwa ntangu to banzo yina bo lenda vanda dibela.

Bampangi-babakala mpi bampangi-bankento ya kele na mabundu me pesa na luzolo yonso bima yina bo kele ti yo sambu bampangi yina ke salaka na Bakomite Yina Ke Pesaka Bantu Lusadisu na Ntangu ya Mpasi kusadisa bampangi. Na bwala mosi buna, bampangi ya mabundu vukisaka bakilo 700 ya mankondo, bakilo 400 ya masangu mpi bakilo 220 ya manioko mpi ya saka-saka.

Diaka, bampangi 60 ya dibundu ya Somé-26-Km yambaka na banzo na bo bampangi-babakala mpi bankento yina tinaka mavwanga yina basikaka na babwala yina bo ke vandaka. Bo vandaka kudia ti bo tii kuna Komite mosi ya Ke Pesaka Bantu Lusadisu na Ntangu ya Mpasi bakaka mambu na maboko.

Na mbanza Brazzaville, nto-mbanza ya République du Congo, mfumu ya dibuta mosi yina bampangi yai sadisaka tubaka nde: “Luzingu lenda soba kukonda kukana. Mono vandaka kusala kisalu mpi bo vandaka kufuta mono mwa mbongo. Nkento na mono mpi vandaka kusala bisalu ya fioti-fioti. Mwa mbongo yina bo vandaka kufuta mono mpi yina nkento na mono vandaka kuzwa na bisalu na yandi vandaka kusadisa beto na kusala badepanse tii na nsuka ya ngonda. Ntangu maladi yai ya coronavirus kotaka awa, bisalu yonso yina vandaka kupesa beto mbongo fwaka. Kansi beto vandaka kaka kutula ntima na Yehowa. Ntangu beto vandaka kusolula sambu na kuzaba inki beto ta sala kana madia yina beto vandaka ti yo me mana, Yehowa sadisaka beto.”

Mpangi-nkento Ester Mbuyi ke vandaka na Kinshasa. Bakala na yandi me fwaka. Yandi ke tuba mpi mambu ya mutindu mosi: “Ngonda mosi me luta banda bakala na mono me fwa mpi mono vandaka kibeni ti mfunu ya lusadisu. Mono kele ve ti kisalu yina lenda sadisa mono na kuzwa mbongo. Mono kele ti bana tatu yina mono fwete disa. Dibuta na mono zolaka kukuka ve kusosa madia mingi mpidiyai sambu beto vanda ti bima ya kudia bilumbu mingi mutindu yai. Mersi Yehowa!”

Beto ke samba Yehowa sambu yandi landa kulungisa bampusa ya bampangi na beto ya babakala mpi ya bankento mpi sambu yandi sakumuna kisalu ya kusadisa bantu yina me bwila mpasi. Beto ke vingila ti nzala ya ngolo ntangu yina bantu yonso ta vanda ti bima mingi ya kudia yina ta katuka na ntoto.—Nkunga 72:16.