Na Lumingu 20 Février 2022, bo basisaka Biblia—Mbalula ya Nsi-Ntoto ya Mpa ya Masonuku ya Kigreki ya Bukristu (Matayo-Kusonga) na ndinga Kipende. Bo basisaka Biblia yai na nzila ya lukutakanu mosi ya bo kotisaka dezia ndinga. Mpangi mosi ya Komite ya Filiale na zina ya Nicolas Hifinger muntu basisaka Biblia yai ya bo lenda sadila na baapareyi. Bampangi ya ke longaka nsangu ya mbote (bansamuni) kiteso ya 10 000 landaka lukutakanu yai. Bantu lenda baka Biblia yai ya papie na ngonda ya Avril 2022.

Disolo ya Bambangi ya Yehowa na teritware yina bantu ke tubaka Kipende yantikaka na bamvu 1960 ntangu bo pesaka muntu mosi na zina ya Makanda Madinga Henri Nzozulu ya Nkengi mosi. Ntangu yandi tadilaka mambu yina vandaka na kati, yandi ndimaka kibeni nde mambu yango vandaka ya kieleka mpi yandi yantikaka kusonga bantu ya nkaka mambu yina yandi vandaka kulonguka. Na nima yandi bakaka mbotika mpi kumaka Mbangi ya Yehowa. Bamvula mingi na nima, dibundu ya ntete na ndinga ya Kipende kangukaka na bwala Kiefu na 1979.

Biblia yai ta sadisa bampangi-babakala mpi bampangi-bankento na kulonguka na bo mosi mpi na kisalu ya kulonga nsangu ya mbote. Mu mbandu, mpangi Hifinger tubaka nde Biblia yai kele ya “siki-siki mpi pwelele,” mpi “yo me vutula zina Yehowa na bisika yonso yina yo vandaka na masonama ya kisina.”

Beto ke samba sambu Biblia—Mbalula ya Nsi-Ntoto ya Mpa yai kusadisa bampangi na beto yina ke landa “kubuta mbuma na konso kisalu ya mbote, mpi ke yela na nzayilu ya sikisiki ya Nzambi.”—Bakolosai 1:10.