21 JANVIER 2022
RÉPUBLIQUE DÉMOCRATIQUE DU CONGO
Kisalu ya Kutunga Banzo ya Betele ya Mpa na République Démocratique du Congo
Na Lubumbashi na République démocratique du congo, kisalu ya kutunga banzo ya mpa, yina ta kuma babiro ya nene ya Betele, ke salama mbote. Bampangi ya Betele kiteso ya 260 ta banda kukwenda na Betele yai ya mpa banda na ngonda ya Mai 2022 kansi bampangi ya Betele 131 ta bikala na Betele yai ya kele na Kinshasa. a Na Kinshasa mpi, pene-pene ya Betele beto kele na kutunga dezia banzo ya nkaka ya kulala mpi ya babiro. Bampangi ya Betele kiteso ya 48 ta kuma kulala mpi kusala na banzo yai ya mpa na nima ya ngonda ya Janvier 2024. Beto ke tunga banzo yai yonso ya mpa sambu na kusadisa kisalu ya kulonga nsangu ya mbote mpi sambu ntalu ya bampangi ya ke longaka nsangu ya mbote ke landa na kukuma mingi na Congo.
Beto kele na kutunga nzo ya ntete na kati ya banzo tatu ya babiro ya mpa yina beto fwete tunga
Na mvula ya kisalu 2021, bampangi na beto ya République démocratique du congo longukaka Biblia ti bantu kuluta 250 000. Bantu kuluta milio mosi kwendaka na Nkinsi ya Kuyibuka Lufwa ya Kristu. Bubu yai bampangi ya Betele kele 394 na Betele ya Kinshasa.
Sambu mpila vandaka ve sambu na kukumisa nene banzo ya Betele ya Kinshasa, bampangi kwendaka kusosa bisika ya nkaka na bambanza ya nkaka. Bo zwaka kisika mosi ya mbote na Lubumbashi sambu na kutunga Betele ya mpa mpi banzo mingi ya nkaka ya beto lenda vanda ti yo mfunu na bilumbu ke kwisa.
Na diboko ya kimama: Kubika fioti bampangi ya Betele kiteso ya 300 ta banda kukwenda na banzo ya mpa ya kulala na Lubumbashi. Na diboko ya kitata: Foto ya ke monisa banzo ya kulala yina bo me manisa kutunga
Betele ya Lubumbashi kele na bakilometre 2 300 ti Kinshasa. Nene ya Betele ya Lubumbashi kele ba ektare (hectare) 12 mpi yo ta vanda ti banzo ya kulala, babiro, depo mosi, nzo mosi ya nene ya kele ti kisika yina bampangi ta kwendaka kudia mpi bisika ya kusala bansaka.
Beto yantikaka bisalu ya kutunga Betele yai na Novembre 2020 kansi maladi ya coronavirus natilaka beto bampasi mingi na bisalu yai.
Mpangi Robert Elongo ya Komite ya Filiale ya Congo Kinshasa ke tuba nde: “Bo kangaka bandilu (frontières) ti bansi ya nkaka. Yo kumaka mpasi sambu na kunata bima ya kutungila kuna mpi yo salaka nde bisalu ya ntete yina beto vandaka kusala kubaka ntangu mingi sambu na kumana.”
Ata mpidina mpangi Elongo ke tuba nde: “Kaka na nima ya mvula mosi, beto manisaka kitini ya nene (40%) ya bisalu ya ntete yina beto vandaka kusala.”
Yo kele pwelele nde Yehowa ke sakumuna bisalu yai. Beto ke samba sambu Betele yai kusadisa bantu na kukuma kutadila bansadi ya Yehowa na mutindu ya mbote mpi sambu yo kumisa zina ya Yehowa Nzambi.—Matayo 24:47.
a Betele ya République démocratique du congo (Kinshasa) ke twadisaka kisalu ya Nzambi na République démocratique du congo mpi na République du congo.
