Na Kintete 14 août 2023, Bambangi ya Yehowa kangulaka kisika ya mpa sambu na bantu yina ke salaka na Betele ya République dominicaine. Betele yai kele na Santo Domingo. Kisika yango kele ti kisika ya bo ke monisaka mambu ya me salamaka mpi ntu-diambu na yo kele “Nzietelo ya Lukwikilu.” Kisika yai ya bo ke songisaka mambu ya me salamaka ke monisa mutindu Bambangi ya Yehowa ya République dominicaine me kumaka ngolo na kimpeve mpi kisalu na bo me butaka mbuma ya mbote ata bo vandaka kuniokula bo mpi kutelamina bo.

Kisika yai ya bo ke songisaka mambu ya me salamaka ke tendulaka disolo ya Bambangi ya Yehowa na République dominicaine. Mu mbandu, yo ke tubilaka mutindu Bambangi ya Yehowa sadilaka mikanda na beto ya ke tendulaka Biblia mpi apareyi ya bo ke bingaka fonografe ya bo vandaka kunata na maboko sambu na kulonga bantu nsangu ya me tala Kimfumu. Yo ke tubilaka mpi mutindu bazulunalu mpi radio sadisaka bo na kulonga bantu mingi kibeni kieleka. Diaka, bantu yina ke kwendaka kusala viziti lenda mona diaka mutindu bamisionere ya ntete longaka nsangu ya mbote na République dominicaine yantika na 1945.

Katula yo, bo ke songisaka mpi mutindu Bambangi ya Yehowa landaka kulonga nsangu ya mbote yo vanda na ntangu yina leta buyisaka kisalu na bo na République dominicaine. Ata bo vandaka kutelemina ngolo kibeni kisalu na beto, bampangi na beto ya bankento ti ya babakala vandaka kikesa mpi bo salaka bakopi ya mikanda yina ke tendulaka Biblia mpi kabisilaka yo bantu. Na nima ya bamvula, bantu mingi longukaka Biblia mpi bo kumaka Bambangi ya Yehowa. Na ntwala ya kumanisa kusongisa mambu yina me salamaka, bo ke songaka bantu ya ke sala viziti mambu yina bampangi na beto ya babakala mpi ya bankento ya République dominicaine ke sala bubu yai mpi bametode ya kulonga nsangu ya mbote yina bo ke sadila.

Mpangi Leonel Peguero ya ke sadilaka Yehowa na Betele yai ya République dominicaine tubaka nde: “Na kisika yai, bantu ya ke sala viziti lenda zaba mambu ya me salamaka mpi yina ke salama bubu yai na ntangu bo ke tala bima ya ntama, bafoto, mpi bavideo ti bima ya kuwidikila yina bo ke tudilaka bo. Yo kele bonso nde nge ke sala nzietelo na nsungi mosi buna sambu na kuzaba mutindu kisalu yantikaka na bamvula yina mpi mutindu kisalu na beto ya bubu yai ke salama. Beto ke lomba bantu yonso ya kele ti makuki na kusala viziti mpi na kuzaba disolo ya Bambangi ya Yehowa ya République dominicaine.”