27 JANVIER 2022
RUSSIE

Bampangi-Bakala Zole Ke Landa Kuvanda Kikesa Sambu Bo Ke Mona Mutindu Yehowa Ke Sadisa Bo

TALA NA

Kubika fioti, Tribinale ya mbanza Kirsanov na a Tambov ta zenga dikambu ya mpangi-bakala Anton Koujelkov mpi mpangi-bakala Nikolaï Prokhorov. Prokirere me tubila ntete ve ndola yina yandi ke zola nde bo pesa bo.

Mutindu Mambu Salamaka

21 décembre 2020

Bamfumu yantikaka kulandila mpangi Anton ti mpangi Nikolaï sambu bo vandaka kutuba nde bampangi yai ke twadisaka mambu na kimvuka mosi ya bantu ya ntu-ngolo
24 décembre 2020

Bantu yina vandaka kusala baanketi kotaka na banzo 19. Bo kotaka mpi na nzo ya mpangi Anton. Bo nataka mpangi Anton na kisika mosi ya kele na bakilometre 350 ti nzo na yandi sambu na kuyula yandi bangiufula. Bo yulaka mpangi Nikolaï bangiufula mpi na nima bo buyisaka yandi na kukatuka na kisika yina yandi vandaka
25 décembre 2020

Bo buyisaka mpangi Anton na kuvutuka na nzo mpi bo tulaka yandi sambu na mwa ntangu na boloko mosi
30 août 2021

Bo nataka mpangi Anton na boloko ya nkaka

Bansangu ya Luzingu na Bo

Anton Koujelkov

Mvula mpi Kisika Yina Yandi Butukaka: 1993 na mbanza Sortavala na république de Carélie

Disolo ya Luzingu na Yandi: Bo butukaka bana tatu ya babakala mpi yandi kele mwana ya ntete. Na kileke, yandi vandaka kuzola kuloba mpi kusala nsaka ya kubaka ntinu na ba glace (snowboard). Yandi longukaka kisalu ya kutunga banzo na papa na yandi

Yandi bakaka mbotika na 2007. Yandi kwelanaka ti Aliona na 2015

Mambu Yina Aliona, Nkento ya Mpangi Anton, Ke Tuba a

Inki bampasi nge kutanaka ti yo sambu na kukwenda kutala bakala na nge Anton na boloko?

Ntangu bo pesaka mono nswa ya kukwendaka kutala yandi ntangu fioti kaka, yo vandaka kulomba nde mono kwenda kumona mfumu yina vandaka kusala baanketi sambu yandi pesa mono nswa yango mbala zole na ngonda. Yo vandaka kaka kupesa mono boma mingi. Diaka na ntwala ya kupesa mono nswa ya kukota na boloko, yo vandaka kulomba ntete nde mono songa ekzame ya mono me sala ya ke monisa nde mono kele ve ti coronavirus. Baekzame yai kele ntalu mingi.

Yo ke pesa mpasi mpenza sambu sesepi yai bo me buyisa baviziti yonso. Kansi bo me yantika mpi kusambisa yandi na tribinale mpi sesepi yai bo me pesa mono nswa ya kukota na tribinale ntangu bo ke sambisa yandi. Mbanza ya bo ke sambisa yandi kele na bakilometre 100 ti nzo na beto.

Inki ke sadisaka bakala na nge na kukanga ntima na boloko?

Yandi ke tubilaka kima ya yandi kele na yo mfunu na kisambu, yandi ke sambaka na masonga yonso mpi nkutu bantangu ya nkaka, yandi ke dilaka ntangu yandi ke bondilaka Nzambi na kisambu. Yai mambu ya ke sadisaka yandi na kukanga ntima. Na konso diambu ya yandi ke kutanaka ti yo, yandi ke monaka mutindu Yehowa ke sadisaka yandi. . . . Yandi ke sepelaka mpi kutala bima ya Nzambi me salaka. Mu mbandu, mbala mingi yandi ke talaka bandeke ntangu yandi ke kwendaka kutambula na kibansala ya boloko. . . . Yandi ke yindulaka mingi mayele ya Ngangi mpi mbandu ya tu-bandeke yina Yezu pesaka. . . . Kusala mambu yai ke sadisaka yandi na kulanda kuvanda na kiese.

Nikolaï Prokhorov

Mvula mpi Kisika Yina Yandi Butukaka: 1964 na Morchan na Tambov

Disolo ya Luzingu na Yandi: Yandi salaka kisalu ya kisoda. Yandi ke sepelaka kukasa mpi kusala banzietelo

Yandi kwelanaka ti Yelena na 2008. Bo kele ti mwana mosi ya bakala mpi mwana mosi ya nkento. Yandi sepelaka ti bikalulu ya mbote ya Bambangi ya Yehowa, yo yina yandi yantikaka kulonguka Biblia. Yandi bakaka mbotika na 2008

Mambu Yina Yandi Ke Tuba

Keti nge lenda songa beto ntangu mosi buna ya nge monaka mpenza mutindu Yehowa sadisaka nge?

Ata na bantangu yina mono ke kutanaka ti bampasi ya ngolo mpenza, konso ntangu Yehowa ke sadisaka mono mingi. . . . Kilumbu mosi, mono vandaka mono mosi ti bamfumu ya Leta. Bo vandaka kusosa kupusa mono na kulanda mambu ya bo vandaka kutuba mpi na kundima nde mono “salaka mbi.” . . . Na ntangu mosi buna, mono vandaka ya kuvanda kisika mosi mpi mono vandaka kuwa boma mingi. Yo yina mono vandaka kudiyula kana mono ta kuka kulanda kukangama na Yehowa. Mono sambaka Yehowa mpi mono lombaka yandi na kupesa mono ngolo mpi ngemba ya ntima. Ntangu mfumu mosi monaka mono me niekisa ntu mpi ke samba, yandi yulaka mono nde: “Sambu na nki nge ke samba?” Mono songaka yandi nde: “Mono ke samba Nzambi sambu yandi sadisa mono na kudiyangisa ve sambu na mambu ya mono ke kutana ti yo.” Na nima, mono yibukaka mambu yina Yezaya 54:17 ke tuba. Mono bakisaka nde bo ta sala mono ve ata kima. Yo pesaka mono kikesa mpi nkutu ata bamfumu ya vandaka pana monaka yo mpi. Nsuka-nsuka, bo yambulaka kubangisa mono. Nkutu bo songaka mono na kukangila bo ve kimbeni.

Inki mutindu bampangi sadisaka nge ti nkento na nge?

Dibundu sadisaka beto mingi kibeni. Sambu na kubenda ve dikebi ya bamfumu, bampangi vandaka kusolula ti beto na telefone. Diaka, beto zwaka ba appel mingi ya bampangi ya Russie mpi ya bansi ya nkaka.

Bantu yonso sadisaka beto na bantangu yai ya mpasi. Ntangu bo vandaka kusambisa beto na tribinale, bampangi kwisaka pana sambu na kupesa beto kikesa . . . Zola ya kieleka yina bampangi monisilaka beto longaka bantu mingi yina vandaka na tribinale mambu ya mbote sambu na Bambangi ya Yehowa. Lusadisu na bo sadisaka kibeni mono ti nkento na mono na kulanda kukangama na Yehowa na bantangu yai ya mpasi.

Beto ke tula ntima nde Yehowa ta landa kusadisa mpi kupesa kikesa na bampangi na beto ya babakala mpi ya bankento yina bo ke niokula.—Bingana 1:33.

a Mpangi Koujelkov kele kaka na boloko yina bo me tulaka yandi sambu na mwa ntangu. Yo yina mpila vandaka ve ya kuwa mambu ya yandi vandaka ti yo ya kutuba.

BANSANGU YA MPA