20 JANVIER 2022
RUSSIE

Bampangi na Beto ya Mbanza Karpinsk Ke Tudila Yehowa Ntima mpi Yo Ke Sadisa Bo na Kuvanda ti Lukwikilu ya Ngolo

TALA NA

Tribinale ya mbanza Karpinsk na provense ya Sverdlovsk ta zenga dikambu ya bampangi-bankento Daria Doulova, Venera Doulova, Anastassia Prianikova, Svetlana Zaliaïeva mpi mpangi-bakala Aleksandr Prianikov ti nkento na yandi. Zuzi ya nene (procureur) me tubila ntete ve bandola yina yina yandi ke zola nde bo pesa bo.

Mutindu Mambu Salamaka

27 janvier 2020

Na diambu ya ntete, bo tubaka nde bampangi Aleksandr, Daria mpi Venera fwaka nsiku
Février 2020

Bo yantikaka diaka kulandila bo sambu na dikambu ya zole
30 mars 2020

Bamfumu kwendaka kusala baanketi na banzo na bo mpi bo botulaka ba-apareyi na bo
19 mai 2020

Bamfumu fundaka bampangi-bankento Anastassia mpi Svetlana nde bo salaka diambu ya mbi. Bo buyisaka bo yonso zole na kusala bavwayaze
29 avril 2021

Tribinale yantikaka kusambisa bo

Bansangu ya Luzingu na Bo

Daria Doulova

Mvula mpi Kisika Yina Yandi Butukaka: 2000, na Mbanza Karpinsk na provense ya Sverdlovsk

Disolo ya Luzingu na Yandi: Bo butukaka bana tatu mpi yandi kele mwana ya nsuka. Yandi ke sepelaka ti mambu ya art mpi kusala bansaka

Ntangu yandi vandaka mwana, yandi vandaka kusepela kumona mutindu bantu ke sadila mambu ya Biblia ke tubaka na luzingu na bo. Yandi bakaka mbotika mpi yandi kumaka Mbangi ya Yehowa na 2016

Mambu Yina Yandi Ke Tuba

Inki mutindu bampasi yai me sadisa nge na kukumisa kinduku na nge ti Yehowa ngolo?

Bampasi yai me sadisa mono na kumona Yehowa bonso muntu ya kieleka. . . . Ntangu mono ke monaka mutindu Yehowa ke sadisaka mono, nkutu ata na mambu ya fioti, yo ke pesaka mono kikesa ya mingi sambu mono ke ndimaka nde Yehowa ta yambula mono ve ata fioti. . . . Baroma 8:38, 39 kele baverse ya ke pesaka mono kikesa ya mingi.

Venera Doulova

Dati mpi Kisika Yina Yandi Butukaka: 1968, na Karpinsk na provense ya Sverdlovsk

Disolo ya Luzingu na Yandi: Mama ti nkaka na yandi ya nkento bantu sansaka yandi. Yandi ke sepelaka kutunga bilele, kutanga mpi kulonguka. Mama na yandi ti nkaka na yandi ya nkento fwaka na ntwala nde yandi lungisa bamvula 17. Yandi kwelaka na 1990. Yandi kele ti bana tatu

Yandi vandaka kudiyula sambu na nki beto ke fwaka mpi mutindu luzingu ya bana na yandi ta vanda na bilumbu ke kwisa. Yandi yantikaka kulonguka Biblia ti Bambangi ya Yehowa ntangu yandi kumaka ti bamvula 28. Yandi bakaka mbotika na 1998

Mambu Yina Yandi Ke Tuba

Inki mutindu Yehowa ke sadisa nge na ntangu yai?

Bampangi na beto ya dibuta yina vandaka ntete kutelemina mono ti bakala na mono me kumaka kuzinga mbote ti beto. Bakala na mono ke sikisaka mono mpi ke siamisaka mono na kulanda kukangama na Nzambi. . . . Yehowa ke sadisaka beto mpi na nzila ya mambu ya ke pesaka kikesa yina bampangi na beto ya babakala ti ya bankento ke tubaka.

Ntangu bamfumu manisaka kusala anketi ya ntete na nzo na mono, mono kuditubilaka ntete nde: ‘Bo me funda mono nde mono me sala diambu ya mbi kibeni. Mono lenda sala yo ve ata fioti! Mono ke mona yo bonso na ndosi mpenza!’ Kansi mpangi mosi pesaka mono ndongisila mpi songaka mono na kutuba nde: ‘Mono me nunga bonso Yezu.’

Aleksandr Prianikov

Mvula mpi Kisika Yina Yandi Butukaka: 1987, na Oudinsk na Teritware ya Khabarovsk

Disolo ya Luzingu na Yandi: Yandi ke zolaka miziki mingi. Yandi ke bulaka kima ya kubudila miziki yina bo ke bingaka accordéon. Yandi vandaka kusala kisalu ya kutula mpi ya kuyidika kura na izine mosi. Bubu yai yandi ke tulaka bakaro na banzo

Yandi ke kwikilaka kaka nde Nzambi kele. Mutindu Nzambi ke tubaka nde bantu ta fwaka diaka ve ata fioti simbaka ntima na yandi. Yandi bakaka mbotika na 2004. Yandi kwelanaka ti Anastassia na 2011

Mambu Yina Yandi Ke Tuba

Inki mutindu bampangi ke pesaka nge kikesa na bantangu yai ya mpasi?

Mpangi-bakala mosi songaka beto na kuyindula mambu yina Nkunga 139:1 ke tuba. Yandi songaka beto nde: “Yehowa ke zolaka beno mingi. Yo yina yandi ke tulaka dikebi na mambu yina beno ke yindulaka, na mutindu beno ke kudiwaka, na mambu ya beno ke tubaka mpi na mambu ya beno ke salaka. . . . Ntotila Davidi zabaka nde Yehowa ke tudilaka konso muntu na kati na beto dikebi. . . . Yandi ke zabaka mbote-mbote mambu yonso yina ke kuminaka beto mpi mambu yonso yina ke salaka nde beto kuma mutindu beto kele. Beto fwete kudiwa ve ata fioti beto mosi.” Mambu yai ya yandi tubaka simbaka kibeni ntima na mono. Yehowa ke sadisaka mono konso kilumbu.

Anastassia Prianikova

Mvula mpi Kisika Yina Yandi Butukaka: 1987, na Karpinsk na provense ya Sverdlovsk

Disolo ya Luzingu na Yandi: Yandi ti yaya na yandi ya bakala, mama na bo muntu sansaka bo. Yandi ke zolaka kuyimba mpi kutunga bilele

Yandi sepelaka ti luzingu ya ngemba yina Biblia ke tubilaka sambu na bilumbu ke kwisa. Yandi bakisaka nde Biblia kele ti bandongisila ya mbote mpi ya mayele. Yandi bakaka mbotika na 2002. Yandi kwelanaka ti Aleksandr na 2011

Mambu Yina Yandi Ke Tuba

Inki mutindu bampasi yai me sadisa nge na kukumisa kinduku na nge ti Yehowa ngolo?

Na bamvula kiteso ya tatu yina bo ke landila beto, lukwikilu na mono me kumaka diaka ngolo mingi. Mono me kumaka diaka kutudila Yehowa kibeni ntima. Mono ke zabaka nde Yehowa ke taninaka beto konso ntangu. Bantangu ya nkaka beto lenda mona bonso nde beto ta kuka diaka ve kukanga ntima, ata mpidina Yehowa ke sadisaka beto na kukanga ntima. Mono me bakisaka mpi nde kana bantu ke pesa beto mpasi mingi, yo ke pusaka beto na kuzola diaka Yehowa mingi.

Svetlana Zaliaïeva

Mvula mpi Kisika Yina Yandi Butukaka: 1975, na Volchansk na provense ya Sverdlovsk

Disolo ya Luzingu na Yandi: Bo butukaka bana tatu. Mama na yandi fwaka ntangu yandi vandaka leke. Ntangu yandi vandaka leke, yandi vandaka kuzola kubula nsaka ya bo ke bingaka hockey mpi nsaka ya balo ya maboko. Yandi vandaka kusala na kisika yina bo ke timunaka charbon. Bubu yai yandi ke salaka diaka ve kisalu yai. Yandi kwelanaka ti Rouslan na 2003. Bo kele ti bana iya

Yandi kumaka ti nzala ya kusadila mambu yina Biblia ke tubaka ntangu yandi bakisaka nde Biblia ke tubaka mambu ya kieleka. Yandi bakaka mbotika na 2016

Mambu Yina Yandi Ke Tuba

Inki mutindu Yehowa ke sadisaka nge na kulanda kuvanda kikesa mpi na kiese?

Mono ke ndimaka kibeni nde kana beto ke landa kutudila Yehowa ntima mpi kana beto kele ve ntima zulu-zulu na ntwala ya konso mpasi yina, mono ti bakala na mono mpi bana na beto, beto ta landa kukangila bampasi yai yonso ntima!

Ata bo ke landa kuniokula bampangi na beto na Russie, lukwikilu na beto ke kuma diaka ngolo ntangu beto ke mona mutindu Yehowa ke monisila bo zola mpi ke sadisa bo. Lukwikilu yina bampangi na beto ke monisa na bantangu ya mpasi ke pesa “lukumu mpi nkembo” na zina ya Yehowa.—1 Piere 1:7.

BANSANGU YA MPA