7 JANVIER 2022
RUSSIE

Bo Ke Sambisa Bampangi Vladimir Tchesnokov, Vladimir Doutkine mpi Valeri Iakovlev Sambu Bo Ke Kwikilaka na Nzambi

TALA NA

BANSANGU YA MPA | Tribinale Mosi ya Russie Me Bedisa Bambangi ya Yehowa Tatu

Na 10 février, 2022, Tribinale ya Distrike ya Kalininski na Mbanza Tcheboksary bedisaka bampangi Vladimir Tchesnokov, Vladimir Doutkine mpi Valeri Iakovlev. Bo futisaka mpangi Doutkine amande ya mbongo 500 000 roubles (6 715 dollars américains) mpi bo futisaka bampangi Tchesnokov ti Iakovlev amande ya mbongo 400 000 roubles (5 372 dollars américains). Bo ta tula bo ve na boloko.

Mutindu Mambu Salamaka

7 juin 2021

Bo me funda diaka bampangi Vladimir Tchesnokov, Vladimir Doutkine mpi Valeri Iakovlev na diambu ya nkaka
30 décembre 2020

Bo fundaka mpangi Vladimir Doutkine mpi bo buyisaka yandi na kusala bavwayaze
25 novembre 2020

Bamfumu landilaka mpangi Vladimir Doutkine mpi na nima basoda kotaka na nzo na yandi mpi bo yantikaka kusala ba-anketi. Bo nataka yandi sambu na kuyula yandi bangiufula

Bansangu ya Luzingu na Bo

Vladimir Tchesnokov

Dati mpi Kisika Yina Yandi Butukaka: 1959, na mbanza Bakhmoutovo na République de Tchouvachie

Disolo ya Luzingu na Yandi: Yandi bakaka diplome na nzo-nkanda ya basoda mpi yandi kumaka mfumu ya basoda (lieutenant). Yandi ti nkento na yandi Nina, bo vandaka ti bana tatu

Ntangu yandi vandaka kusala kisalu ya kisoda, yandi longukaka mambu yai ya Biblia ke tubaka nde, bantu ta “kumisa bambele na bo ya bitumba bima ya kubundudila ntoto mpi bo ta kumisa makonga na bo bakupu-kupu.” (Yezaya 2:4) Yandi yambulaka kisalu ya kisoda mpi yandi bakaka mbotika na 1993

Mambu Yina Yandi Ke Tuba

Inki mutindu bampangi ke sadisaka nge?

Bampangi ya babakala mpi ya bankento ke sadisaka beto mingi. . . . Ntangu bamfumu vandaka kubuyisa beto na kubasisa mbongo na konti na beto ya banki, bampangi vandaka kupesa beto mbongo. Yo vandaka kuyitukisa nkento na mono mingi. Yandi vandaka ve Mbangi ya Yehowa na ntangu yina. Sesepi yai, yandi me kumaka kumona mambote yina beto ke bakaka kana beto ke sadila malongi ya kieleka ya kele na Biblia. Yandi me kumaka kusepela ti malongi ya Biblia mpi yandi ke sosaka diaka ve kukanga mono nzila ya kusambila Yehowa mutindu yandi vandaka kusala yo ntete.

Vladimir Doutkine

Mvula mpi Kisika Yina Yandi Butukaka: 1963, na mbanza Novoaltaïsk na teritware ya Altaï

Disolo ya Luzingu na Yandi: Yandi vandaka kusala bansaka mingi na kileke na yandi, mu mbandu nsaka ya balo ya maboko, nsaka ya balo ya makulu mpi nsaka ya bo ke bingaka hockey. Yandi ke salaka na kimvuka mosi ya ke tadilaka mambu ya asiranse

Mambu yina Biblia tubaka nde yo ta salama ya yandi longukaka mpi kulonguka mutindu yo salamaka, ndimisaka yandi nde Yehowa Nzambi muntu lungisaka yo. Yandi bakaka mbotika na 2002

Mambu Yina Yandi Ke Tuba

Inki ke pesaka nge kikesa na ntangu yai ya mpasi?

Ntangu basoda manisaka kusala ba-anketi na nzo na mono, mono sambaka Yehowa sambu yandi pesa mono kiese mpi mayele. Na ntangu yai yonso, mono ke yindulaka mutindu bikalulu na mono ya mbote lenda santisa zina ya Yehowa. . . . Kuyindula mambu yai ke landaka kupesa mono kikesa.

[Diaka, mono ke sepelaka mpi] kusonga bampangi na beto ya babakala mpi ya bankento balusakumunu yonso ya mono ke bakaka. Mono ke ndimaka nde yo ke kumisaka lukwikilu na bo ngolo . . . Yo ke pesaka kiese na kuwa bampangi mingi ke tuba nde mbandu na mono ke sadisaka bo na kuwa diaka ve boma.

Valeri Iakovlev

Mvula mpi Kisika Yina Yandi Butukaka: 1968, na Vourmankas-Iadrino na République de Tchouvachie

Disolo ya Luzingu na Yandi: Yandi ke salaka kisalu ya kutula mpi kuyidika batiyo to banzila yina masa fwete luta (plomberie). Yandi kwelanaka ti Nadejda na 1989. Bo kele ti bana zole ya babakala mpi mwana mosi ya nkento

Kulonguka mambu yina Biblia ke tubaka sambu na lufutumuku ke pesaka yandi kikesa. Yandi bakaka mbotika na 1996

Mambu Yina Yandi Ke Tuba

Inki ke sadisaka nge na bantangu ya mpasi?

Mono ke tulaka dikebi ya mingi na balusakumunu yina Yehowa ke pesaka mono mpi na kisalu ya kulonga nsangu ya mbote. Mono ke salaka bikesa ya kulanda kukumisa kinduku na mono ti Yehowa ngolo mpi ntangu yonso, mono ke salaka ngolo na kudiyangisa ve sambu na mambu ya mono ke kutanaka ti yo.

Kutanga Ndinga ya Nzambi mpi kuyindula na mudindu mambu yango ke sadisaka bampangi na beto ya babakala ti ya bankento na kukanga ntima na bampasi yina bo ke kutanaka ti yo konso kilumbu mpi yo ke sadisaka bo na kubakisa nde Yehowa ke bumbaka bo na “kisika na yandi ya lutaninu na kilumbu ya mpasi.”—Nkunga 27:5.

BANSANGU YA MPA