Na Yuli 23, 2021, Tribinale ya Novossibirsk buyaka kutadila diaka lukanu yina bo bakaka sambu na mpangi Vitali Popov mpi zengaka nde yandi fwete sala bamvula tatu ya boloko yina bo zengilaka yandi dezia. Kansi yandi ta kota ve boloko na mbala mosi.

Na Mayi 21, 2021, Tribinale ya Distrike ya Leninski na Novossibirsk zengilaka mpangi Vitali Popov boloko ya bamvula tatu. Kansi yandi ta kota ve boloko na mbala mosi.

Vitali Popov

• Mvula mpi Kisika Yina Yandi Butukaka: 1967 (Novossibirsk)

• Disolo ya Luzingu na Yandi: Yandi ke salaka bisalu ya kuran (électricien) mpi ya bibende (soudeur). Yandi salaka na makesa ya Union Soviétique. Yandi ke zolaka kusala nsaka na neze, kubula ballon, volley-ball mpi kuyimba. Yandi yelaka ti bampangi na yandi zole ya babakala mpi zole ya bankento. Ntangu yandi vandaka toko, diambu mosi ya mpasi mingi kuminaka yandi: mbuta na yandi ya bakala mpi mbuta na yandi ya nkento fwaka. Vitali vandaka ti bangiufula mingi sambu na lufwa mpi bilumbu ya ke kwisa

  Yandi yantikaka kulonguka Biblia ti Bambangi ya Yehowa pene-pene ya mvu 1990. Yandi zwaka bamvutu ya mbote na bangiufula yina yandi vandaka kudiyula sambu na lufwa. Ntangu yandi monaka mutindu Bambangi ya Yehowa ke zolana, ke zitisana mpi ke sadisana, yo simbaka kibeni ntima na yandi. Yandi bakaka mbotika na 1994. Yandi kwelanaka ti Natalia na 2011.

Na Yuni 27, 2019, bamfumu fundaka Vitali nde yandi me fwa nsiku. Na Aprili 9, 2020, basoda kwendaka kubaka yandi na nzo na yandi mpi bo nataka yandi sambu na kuyula yandi bangiufula. Bo salaka bangunga kuluta iya sambu na kuyula yandi bangiufula.

Bo tulaka zina ya Vitali na lisiti ya bantu yina insi na bo ke tubaka nde bo kele bantu ya ntu-ngolo. Yo salaka nde yandi sadila diaka ve mbongo yina yandi vandaka ti yo na banki. Bangonda zole na nima, bo pusaka Vitali na kukatuka na kisalu. Diambu yai salaka nde dibuta na yandi kuvanda ve ti mbongo yina bo vandaka ti yo mfunu sambu na kusumba bima ya mfunu ya luzingu.

Yehowa landaka kulungisa bampusa ya dibuta ya Vitali. Vitali ke tuba nde: “Yandi ke sadisaka beto na kulanda kuvanda pene-pene ti yandi, yandi ke pesaka beto bima yina beto kele ti yo mfunu na kinsuni mpi yandi ke pesaka beto kikesa. Dibuta na mono ya mvimba ke pesa Yehowa mersi sambu na lusadisu na yandi mpi yandi me sadisaka beto na kukangila bampasi na beto yonso ntima mpi na kulanda kuvanda na ngemba mpi na kiese.”

Vitali ke tendula inki sadisaka yandi na kukanga ntima. Yandi ke tuba nde: “Yo kele sambu mono ke sambaka Yehowa mbala na mbala mpi mono me kumisaka kinduku na mono ti yandi ngolo. Yandi me kumaka diaka muntu ya kieleka na meso na mono. Mono me longukaka na kutudila yandi ntima yo vanda na ntwala ya nki dikambu.” Na kati ya mambu yina Vitali ke salaka sambu na kusambila Yehowa, beto lenda tanga lusambu ya dibuta, kuvukana na balukutakanu ya dibundu mpi kupesa bakomantere, kusala mbala na mbala kisalu ya kulonga nsangu ya mbote mpi kusala bisambu ya ke katuka na ntima. Yandi ke tuba nde: “Kana mono vandaka ve kusala mambu yina, yo zolaka kuvanda mpasi nde bo tudila Yehowa ntima mpi mono kanga ntima na bampasi yina yonso.”

Beto ke vingila nde tribinale kuzenga makambu ya mpangi Vitali. Kansi beto ke samba ntete Yehowa sambu na yandi. Beto me zaba nde Yehowa, ‘muntu yina ke pesaka beto ngolo,’ ta landa kupesa bampangi na beto ya babakala mpi ya bankento yina kele na Russie kikesa awa ya bo ke landa kukanga ntima ti kikesa yonso na mbangika.—Bafilipi 4:13.