Na Kintete, Augusti 3, 2020, Tribinale ya Pskov lombaka nde bo basisa mpangi Guennadi Chpakovski na boloko. Tribinale me tuba nde yandi fwaka nsiku mpi yo fwanaka nde bo zengila yandi boloko, kansi na kisika nde yandi vanda na boloko bamvula sambanu ti ndambu, bo me pesa yandi yina bo ke bingaka “liberté conditionnelle” sambu yandi lungisa ntalu ya bamvula yina bo zengilaka yandi. Ntangu fioti na nima ya lukanu yai, bo basisaka mpangi Chpakovski na boloko. Zuzi ya nene lenda lomba diaka nde tribinale kutadila diaka lukanu yai.