Na 25 Janvier tribinale ya Trusovskiy na provense ya Astrakhan kangaka mpangi-nkento Anna Safronova yina vandaka ti bamvula 56 mpi bo tindaka yandi mbala mosi na boloko yina bo ke sadisaka bantu bisalu ya ngolo sambu na bamvula sambanu.

1. 28 Mai 2021

   Bo me yantika kusambisa yandi

2. 2 Juin 2021

   Bapolisi kotaka na nzo ya mpangi-nkento yai kisika yina yandi ke zingaka ti mama na yandi yina kele ti bamvula 81. Bo tulaka yandi na kasho

3. 3 Juin 2021

   Bo basisaka yandi na kasho mpi bo songaka yandi na kuvutuka na nzo na yandi kansi bo songaka yandi nde yandi fwete basika na nganda ya lupangu kaka banda na 9h00 tii 10h00

4. 10 Juin 2021

   Bo yikaka zina na yandi na lisiti ya bantu ya ntu-ngolo mpi bo kangaka mbongo na yandi yonso yina vandaka na banki

5. 24 Janvier 2022

   Yai mambu ya nsuka yina yandi tubaka na ntwala nde bo sambisa yandi: “Yezu songaka balongoki na yandi na Matayo 5:44 na ‘kuzola bambeni na bo mpi na kusamba sambu na bantu yina ke monisa bo mpasi.’ Sambu na nki? Sambu bantu mingi yina vandaka kupesa bansadi ya Nzambi mpasi kumaka bansadi ya Yehowa.

   “Mono vandaka kutula ntima nde ata polisi mosi, to bantu yina vandaka kusosa kuzaba mambu ya me tala beto, bantu yina ke talaka baboloko, bazuzi mpi bantu ya nkaka yina vandaka kuwidikila mono mpi kumona bikalulu na mono ta soba mutindu bo ke tadilaka Bambangi ya Yehowa . . . Mpi mbala ya nkaka muntu mosi na kati na bo ta sepela kutanga Biblia, ta baka bamvutu na bangiufula yina yandi ke kudiyulaka mpi ta kuma ti nzala ya kuzaba Nzambi to nkutu ta kuma nsadi ya Nzambi.”

6. 25 Janvier 2022

   Bo kangaka yandi mpi bo zengilaka yandi bamvula 6 ya boloko

Bambandu ya kwikama ya bampangi na Russie mpi na Crimée ke pesa beto kikesa mpi yo ke pusa beto na kutudila tata na beto ya zulu ntima sambu yandi ke sadisaka beto na kukanga ntima.—2 Batesalonika 1:4.