YULI 7, 2021
RUSSIE
Mbandu ya Bampangi ya Nkaka Ke Pesaka Mpangi Konstantin Moïsseïenko Kikesa
NSANGU YA MPA | Tribinale Mosi Me Buya Kutadila Diaka Lukanu Yina Bo Bakaka Sambu na Mpangi Konstantin
Na Septembri 9, 2021, Tribinale ya Nziunga Amour buyaka kutadila diaka lukanu yina bo bakaka sambu na mpangi Konstantin Moïsseïenko mutindu yandi lombaka. Bo me bika lukanu yina bo bakaka dezia sambu na yandi. Yandi ta kota ve boloko sesepi.
Na Yuli 14, 2021, Tribinale ya Distrike ya Zeïski na nziunga ya Amour zengilaka mpangi Konstantin Moïsseïenko boloko ya bamvula sambanu. Kansi sesepi yandi ta kota ve boloko.
Bansangu ya Luzingu na Yandi
Konstantin Moïsseïenko
Mvula mpi Kisika Yina Yandi Butukaka: 1976 (Abakan, République de Khakassie)
Disolo ya Luzingu na Yandi: Yandi kele ti bampangi zole ya kele mapasa. Mapasa yai kele baleke na yandi. Ntangu yandi vandaka toko, yandi vandaka kusala nsaka yina bo ke bingaka arts martiaux. Yandi kumaka kutwadisa mambu ya informatique (systèmes informatiques) mpi kumaka ingénieur
Na 1998, yandi kwelaka Margarita. Margarita kele Styliste. Bo zole bo yantikaka kulonguka Biblia ti Bambangi ya Yehowa na luyantiku ya mvu 2000. Konstantin monaka nde Biblia ke tubilaka mambu ya ntama mpi mambu ya siansi na siki-siki yonso. Yo pesaka yandi nzala ya kuzaba mambu mingi. Bo bakaka mbotika, yandi ti nkento na yandi, mwa bilumbu na nima kaka na mvula yina
Tata na yandi me fwaka bamvula kumi me luta. Yandi vandaka kulungisa bampusa ya mama na yandi yina vandaka kifwa-meso bamvula sambanu tii na lufwa ya mama na yandi. Yandi me katuka kufwa ntama ve
Mambu ya Salamaka
Na Marsi 11, 2019, Departema mosi [(département d’enquête du Service fédéral de sécurité (FSB)] ya nziunga ya Amour fundaka mpangi Konstantin Moïsseïenko nde yandi me fwa nsiku. Yo salaka nde bapolisi kukwenda kukota na banzo tanu ya Bambangi ya Yehowa, tanga mpi nzo ya mpangi Konstantin. Bo botulaka baordinatere ya maboko, batelefone na bo mpi mikanda na bo. Bo yikaka zina ya Konstantin na lisiti ya bantu ya ntu-ngolo ya insi Russie. Yo me salaka nde yandi baka ve mbongo na yandi yina kele na banki.
Konstantin ke yibuka kima mosi ya ke pesa yandi kikesa. Yo kuminaka bo na 2018 ntangu bo vandaka na lukutakanu ya distrike na Séoul na Corée du Sud. Ntangu lukutakanu vandaka kusalama, mpangi mosi ya vandaka kusala diskure lombaka bampangi yina bo me kotisaka boloko sambu na lukwikilu na bo na kutelama. Konstantin ke tuba nde: “Kiteso ya bampangi yonso ya vandaka na stade telamaka. Mutubi tubaka nde: ‘Beno tala! Bo kele na luzingu mpi bo kele mbote!’ Yo sadisaka mono na kumona pwelele nde beto lenda vanda ya kukangama ti Yehowa na ntangu ya mpasi.” Mutubi tubilaka mpi bangindu ya kele na Nkunga 23:5 ya ke tuba nde: “Nge me yidikila mono mesa na ntwala ya bambeni na mono. Nge ke pakula mono mafuta na ntu; Dikopa na mono me fuluka meke.” Konstantin ke yibuka nde bangogo yina pesaka yandi kibeni kikesa.
Konstantin ke bakaka mpi na valere ya mingi lusadisu ya Bambangi ya nkaka ya Yehowa. Mutindu yandi me zaba nde Bambangi ya Yehowa ya ntoto ya mvimba ke landilaka na dikebi yonso mambu na yandi mpi ke sambaka sambu na yandi ke simba kibeni ntima na yandi. Yandi ke tuba nde: “Mono ke mona kibuka ya nene ya bampangi me telama na lweka ya konso mpangi ya bakala to ya nkento yina bo ke monisa mpasi na insi na beto. Bampangi yina ke sadila mambu yina kele na 1 Yoane 3:16 ya ke tuba nde: “Beto fwete pesa luzingu na beto sambu na bampangi na beto.”
Beto ke wa kiese mutindu beto me zaba nde Yehowa ke landa kupesa bampangi na beto ya babakala mpi ya bankento yina kele na Russie kikesa. Diambu yai ke ndimisa beto diaka nde Yehowa ta pesa beto mpi “ngolo mpi kikesa” kana bantu ke niokula beto.—Nkunga 68:35.