AUGUSTI 9, 2019
RUSSIE
Mpangi Andrzej Oniszczuk ke Zola Kulungisa Mvula Mosi na Boloko
Mpangi Andrzej Oniszczuk yina vandaka kuzinga na Pologne vandaka na kisika yina bo zolaka kusambisa yandi na Russie banda ntangu yina bo kangaka yandi na Oktobri 9 2018. Bo sobaka kilumbu yina bo zolaka kusambisa yandi na mbala ya tanu. Dati ya nsuka yina bo tulaka vandaka Oktobri 2 2019; bilumbu fioti sambu na kulungisa mvula mosi na boloko.
Mpangi Andrzej ti nkento na yandi Anna na ntwala nde bo kanga yandi. Bo pesaka ve Anna nswa ya kutala bakala na yandi Andrzej banda bangonda kumi yina bo kangaka yandi
Mpangi Andrzej Oniszczuk vandaka na boloko mpi bo tulaka yandi na kisika yina yandi vandaka kaka yandi mosi. Banda na 6:00 tii na 21:00, bo pesaka yandi ve nswa ya kulala. Bo pesaka yandi kaka nswa ya kuyobila masa ya tiya minuta 15 mbala mosi na konso mposo. Bo buyisaka Anna nkento na yandi na kukwenda kutala yandi bangonda kumi yina yandi salaka na boloko. Bo vandaka kusolula kaka na mikanda. Anna vandaka kulomba nswa mbala na mbala sambu na kutala Andrzej, kansi Bamfumu ya boloko vandaka kubuya.
Mutindu beto me tubila yo, bo kangaka mpangi Andrzej ntangu bapolisi ya bwala yina mpi basoda ya nkaka kotaka na kingolo-ngolo na nzo na yandi mpi na banzo ya bantu ya nkaka 18 na Kirov. Bo fundaka mpangi Andrzej nde yandi kele muntu ya nku sambu yandi vandaka kuyimba bankunga ya Kimfumu mpi kulonguka mikanda na beto.
Mpangi Andrzej mpi bampangi iya ya nkaka ya Kirov (Maksim Khalturin yina kele ti bamvula 44, mpangi Vladimir Korobeynikov yina kele ti bamvula 66, mpangi Andrey Suvorkov yina kele ti bamvula 26 mpi mpangi Evgeniy Suvorkov yina kele ti bamvula 41); bo kangaka bampangi yai na mvula me luta sambu na kusambisa bo. Bo tulaka bo ntete na boloko. Mpangi Andrzej mpi bampangi yai iya ke vingila tii ntangu bo ta sambisa bo na Tribinale ya Ke Nwaninaka Banswa ya Bantu na Eropa.
Na mvula yai, bamfumu ya Russie fundaka bampangi na beto nsambwadi ya Kirov nde bo kele bantu ya nku. Mpangi Yevgeniy Udintsev yina kele ti bamvula 70 vandaka mbuta na kati ya bampangi yina bo kangaka. Bo ke funda bambangi ya Yehowa 12 na Kirov nde bo kele bantu ya nku sambu na lukwikilu na bo.
Sambu na mpangi Andrzej, Anna mpi bampangi ya nkaka ya Russie, beto fwete vila ve ata fioti mambu yai ya Biblia ke tubaka: “Beno yindula bantu yina kele na boloko, bonso nde beno kele na boloko ti bo, mpi bantu yina bo ke monisa mpasi, sambu beno mosi mpi beno kele na nitu.”—Baebreo 13:3.