Na 7 juin 2021, Tribinale ya mbanza Tcheliabinsk tubaka nde mpangi Dmitriy Vinogradov salaka diambu mosi ya mbi. Yo yina bo zengilaka yandi bamvula zole ya boloko kansi bo tubaka nde yandi ta lutisa na nganda ya boloko, bamvula ya ndola yina bo zengilaka yandi.

Dmitriy Vinogradov

• Dati mpi kisika yina yandi butukaka: 1963 na Tcheliabinsk

• Disolo ya luzingu na yandi: Bibuti na yandi fwaka makwela mpi na nima mama na yandi muntu sansaka yandi. Yandi vandaka kuzola mingi kusala nsaka ya bo ke bingaka jeu d’échecs. Na nima yo kumaka kisalu yina yandi kumaka kusala. Yandi ke longaka na nzo-nkanda mosi yina bo ke longaka nsaka yai. Yandi kwelanaka ti Zhanargul na 1990. Bo kele ti bana iya mpi zole ya baleke ke zingaka ti bo tii bubu yai.

  Yandi vandaka kudiyula sambu na nki bantu ya mayele ke bebisaka ntoto mpi ke salaka bantu ya nkaka mbi. Yandi zwaka bamvutu ya mbote na Biblia. Yandi bakaka mbotika na 2014 mpi kumaka Mbangi ya Yehowa.

Na nsuka ya mvula 2018, bo tindaka bantu ya nkaka ya guvernema na nzo ya mpangi Dmitriy. Bo songaka bo na kusala bonso nde bo ke sepela ti mambu ya Biblia sambu mpangi Dmitriy kulonguka ti bo. Na janvier 2020, bamfumu tubaka nde bo kumaka ti mambu ya me fwana ya kufundila yandi. Bangonda zole na nima, basoda kotaka na nzo na yandi mpi bo yantikaka kusosa-sosa ntangu yandi vandaka ve na nzo.

Mpangi Dmitriy ke belaka meso mpi tansio ya kumata. Yandi ke tuba nde: “Sante na mono kele ve kima ya ke sadisaka mono na kuvanda ti kinduku ya ngolo ti Yehowa. Mono kele na kiese mingi ya kulonga nsangu ya mbote na tribinale.”

Mpangi Dmitriy ti dibuta na yandi ke vandaka ti programe ya mbote ya kutanga Biblia mpi ya kuyindula mingi mambu yina bo ke tangaka. Diaka bo ke yidikaka balukutakanu, ke kwendaka na balukutakanu mpi ke pesaka bamvutu na balukutakanu. Na nima ya bamvula, kusala mambu yai me kumisaka diaka ngolo kinduku na bo ti Yehowa. Diaka yo me sadisaka bo na kuzolana mingi mpi na kuvanda ya kuyilama mbote sambu na kukanga ntima na bampasi. Yandi ke tuba diaka nde: “Bisambu ya bampangi na beto ya babakala ti ya bankento kele mpi kima ya ke sadisaka beto mpenza. Yehowa ke waka bisambu ya bansadi na yandi mpi dibuta na beto ke bakaka balusakumunu mingi ya Yehowa.”

Mbandu ya bampangi na beto ya babakala mpi ya bankento yina ke landa kukanga ntima ti kikesa mpi kiese na bampasi ke longa beto mambu mingi. Ntangu beto ke yindulaka bampangi na beto ya Russie, beto ke kudiwaka bonso Bakristu yina tubaka mambu yai na 2 Batesalonika 1:4: “Beto ke kudikumisaka sambu na beno na kati ya mabundu ya Nzambi sambu beno ke kanga ntima mpi beno kele kaka ti lukwikilu, ata beno ke kutana ti bambangika mingi mpi bampasi mingi.”