Na Yuli 19, 2021, Tribinale ya Solombalski ya Mbanza Arkhangelsk tubaka nde mpangi Ievgueni Iakkou salaka diambu mosi ya mbi. Yo yina, bo zengilaka yandi amande ya mbongo ya badolare kiteso ya 12 082. Bo ta tula yandi ve na boloko.

Ievgueni Iakkou

• Mvula mpi Kisika Yina Yandi Butukaka: 1980 na Bwala Sosnovets na république de Carélie

• Disolo ya Luzingu na Yandi: Ntangu yandi vandaka leke, yandi yitukaka na kumona mutindu mambu yina Biblia tubaka na ntwala nde yo ta salama ke lunganaka. Yandi bakaka mbotika mpi kumaka Mbangi ya Yehowa na 2006. Yandi katukaka na mbanza Arkhangelsk sambu na kukwenda kulonguka na nzo-nkanda mosi ya ke longaka mambu ya komerse. Yandi kwelanaka ti Irina na 2007. Bo ke sepelaka kusala bavwayaze mpi kubaka mupepe na nganda

Na suka na Februari 18, 2019, bamfumu ya Russie kotaka na ngolo na nzo ya mpangi Ievgueni Iakkou mpi bo kangaka yandi sambu bo tubaka nde yandi vandaka kusala mambu ya “mubulu.” Bamfumu ya bapolisi tulaka mpangi Ievgueni na boloko. Yandi salaka bilumbu zole na boloko. Bampangi na yandi ya dibuta mpi banduku na yandi zabaka ve kisika yandi vandaka.

Ntangu bo basisaka mpangi Ievgueni na boloko, bo songaka yandi na kubasika ve na nzo na yandi na nkokila sambu na kukwenda kutambula, bo songaka yandi mpi na kuvukana ve na konso mutindu yina ti bantu ya nkaka na nzo na yandi mpi na kutela ve bantu ya nkaka mambu yina bo sambisaka yandi yo vanda na telefone, na ba message (e-mail) to na nzila ya Internet. Bangonda nsambwadi na nima, tribinale katulaka yandi bandola ya nkaka mpi bo pesaka yandi nswa ya kubasika na nzo na yandi na nkokila sambu na kukwenda kutambula.

Na Novembri 2019, bo fundaka mpangi Ievgueni nde yandi vandaka kusadisa bantu mambu ya “mubulu.” Na nima, bo fundaka yandi nde yandi salaka mambu mingi ya nkaka ya mbi. Kana yandi salaka mpenza mambu yango ya mbi, bo ta zengila yandi bamvula 15 ya boloko. Mambu yina bo fundaka mpangi Ievgueni salaka nde bo katula yandi na kisalu, bo pesa yandi diaka ve nswa ya kubaka mbongo na konti na yandi ya banki mpi bo botula bakamio na yandi zole.

Na ntangu yina ya mpasi, mpangi Ievgueni ti nkento na yandi Irina vandaka kaka kutudila Yehowa ntima. Mpangi-nkento Irina ke tuba nde: “Ntangu mono ke monaka mutindu Yehowa ke pesaka bamvutu na bisambu na mono mpi mutindu yandi ke sadisaka Jenia [Ievgueni] ti mono mosi, mono ke zabaka ve nki mpila mono lenda pesa yandi kibeni mersi.”

Mu mbandu, mpangi-nkento Irina sambaka Yehowa sambu yandi pesa bakala na yandi ngemba ya ntima mpi mayele ya kutubila mbote mambu yina yandi ke kwikilaka ntangu bo ke sambisa yandi. Mpangi-bakala Ievgueni sambaka mpi sambu na mambu ya mutindu mosi. Yandi ke tuba nde: “Mono vandaka kulomba Yehowa na kupesa mono mayele na konso ntangu yina yo vandaka kulomba nde mono kwenda na ntwala ya bantu yina vandaka kusala ba-anketi (enquête) to na konso ntangu yina bo vandaka kusambisa mono.” Yandi ke tuba nde Yehowa pesaka bamvutu na bisambu na yandi. Yandi ke tuba nde: “Mono vandaka kutuba mambu yina yo vandaka kulomba nde mono tuba, ata mpidina mono vandaka ve kutuba mingi.” Yandi ke tuba diaka nde: “Yehowa ke sadisaka mono na kubakisa nde yandi me yambulaka mono ve mpi nde yandi ke pesaka bamvutu na bisambu na mono na mutindu mosi ya pwelele. Bubu mono me kumaka kumona diaka pwelele mutindu Yehowa ke sadisaka mono na luzingu na mono.”

Beto ke vingila lukanu ya tribinale. Ata mpidina beto ke tula ntima nde Yehowa ta landa kupesa mpangi Ievgueni kikesa ya kusamba “ti mawete mpi luzitu ya mingi.”—1 Piere 3:15.