4 JANVIER 2022
RUSSIE

Mpangi Pyotr Krupnov mpi Nkento na Yandi Maya Kele Kaka Ngolo Sambu Bo Yilamaka na Ntwala mpi Sambu Bo Kele ti Kivuvu

TALA NA

Ntangu Mambu Salamaka

30 Décembre 2021

Tribinale ya distrike ya Nikolskiy na mbanza Penza zengilaka mpangi Pyotr Krupnov ti nkento na yandi Maya boloko ya bamvula tatu. Tii pana bo me kota ntete ve na boloko
25 Octobre 2021

Bo yantikaka kusambisa bo
12 Octobre 2021

Bo yikaka mpangi Pyotr ti Maya na lisiti ya bateroriste mpi ya bantu ya ntu-ngolo sambu bo vandaka kutuba mambu ya Nzambi ti banduku na bo
15 Septembre 2021

Bo yantikaka kusambisa mpangi-nkento Maya. Ebuna ntangu fioti na nima, bo yantikaka mpi kusambisa mpangi Pyotr
11 Octobre 2021

Na mbanza Nikolsk, bapolisi kotaka na banzo ya mabuta iya ya Bambangi ya Yehowa mpi na nzo ya mpangi Krupnov

Bansangu ya Luzingu na Yandi

Pyotr Krupnov

Mvula Yina Yandi Butukaka: 1963

Disolo ya luzingu na yandi: Yandi ke salaka kisalu ya plomberie. Yandi yantikaka kulonguka Biblia ti Bambangi ya Yehowa na 1996. Na nima ya kutanga mikanda na beto mpi kutala bikalulu ya mbote ya mpangi yina vandaka kulonguka ti yandi Biblia, yandi ndimaka kibeni nde yandi me zwa kieleka. Yandi bakaka mbotika na 2002

Yandi kutanaka ti mpangi Maya na lukutakanu mosi ya dibundu mpi bo kwelanaka na 2008

Mambu Yina Yandi Mosi Ke Tuba

Keti nge ke yibuka kilumbu mosi yina nge monaka nde Yehowa sadisaka nge?

Kilumbu mosi mono sambaka Yehowa sambu yandi pesa mono mpeve santu na yandi mpi na nima mono yibukaka mambu ya kele na mukanda ya Yoane 10:28 ya ke tuba nde: “Ata muntu mosi ve ta botula bo na maboko na mono.” Ntangu mono yindulaka mambu ya verse yai ke tuba, yo pesaka mono kikesa mpi yo pesaka mono kiese. Mono zabaka nde Tata na mono vandaka ti mono mpi yandi vandaka kusadisa mono. Yo pesaka mono ngemba mpi yo katulaka mono boma.

Inki ke sadisaka nge na kukanga ntima?

Mono ke zabaka nde bampasi yonso ya mono ke kutana ti yo kele kima ya mpamba kana mono fwanisa yo ti dibaku ya kusadila Yehowa mpi ya kubaka luzingu ya mvula na mvula na paladisu. Zola na mono sambu na Yehowa mpi sambu na bampangi na mono ya nkaka ke pesaka mono ngolo sambu mono kanga ntima na bampasi ya mono ke kutanaka ti yo.

Maya Krupnova

Mvula Yina Yandi Butukaka: 1957 (na mbanza Atasu, Kazakhstan)

Disolo ya luzingu na yandi: Yandi vandaka kusala mampa mpi bagato. Bubu yai, yandi ke salaka masamba

Yandi zabaka Bambangi ya Yehowa na nzila ya mwana na yandi ya nkento. Bo zole bakaka mbotika na 2001

Mambu Yina Yandi Mosi Ke Tuba

Inki mutindu nge yilamaka sambu na kununga mambu yai ya mpasi?

Mono yantikaka kuyilama ntangu bo bandaka kukanga bampangi na mbanza ya kele pene-pene ti beto. Mono tangaka mukanda ya Estere mpi ya Yeremia. . . . Mono tangaka bansangu ya kele na site na beto mpi mono kangaka bankunga na beto na ntu. Mono yidikaka saki ya bima ya mfunu mpi saki ya kukwenda ti yo na boloko. . . . Mono sambaka Yehowa sambu yandi pesa mono mayele mpi kikesa sambu mono wa ve boma mpi mono tudila yandi ntima ata bo vandaka kupesa mono mpasi.

Inki Mutindu Bampangi ya Dibundu Sadisaka Nge?

Bampangi vandaka kupesa mono kikesa ya mingi, mingi-mingi ntangu yina mono vandaka penza na mpasi. Ntangu mono vandaka ti basusi ya mingi, bampangi vandaka kubinga mono, bo vandaka kusonikila mono mpi bo vandaka kusonga mono nde bo ke zolaka mono mingi. . . . Mono vandaka kuzaba nde mono kele na kati ya dibuta ya nene ya bampangi yina ke zolaka mono. Mono zabaka yo mpenza mbote-mbote banda na 2020.

Mbandu ya mpangi Pyotr mpi Maya ke pesa beto kiese ya mingi sambu bo vidisaka ve kivuvu na bo mpi sambu bo tudilaka Yehowa ntima.—Baebreo 6:19.

BANSANGU YA MPA