YUNI 21, 2021
RUSSIE
Mpangi Tatiana Cholner Ke Landa Kutudila Yehowa Ntima mpi Kele Kaka na Kiese na Ntwala ya Mimekamu
NSANGU YA MPA | Tribinale Mosi ya Russie Me Buya Kutadila Diaka Lukanu Yina Bo Bakaka Sambu na Mpangi Tatiana
Na Desembri 16, 2021, Tribinale Mosi (tribunal de la Région autonome juive) buyaka kutadila diaka lukanu yina bo bakaka sambu na mpangi Tatiana mutindu yandi lombaka. Yandi ke kota ve boloko sesepi.
Na Yuni 25, 2021, Tribinale mosi (tribunal du district de Birobidjan de la Région autonome juive) zengilaka Mpangi Tatiana Cholner boloko ya bangonda 30. Kansi yandi ta kota ve boloko sesepi.
Bansangu ya Luzingu na Yandi
Tatiana Cholner
Mvula mpi Kisika Yina Yandi Butukaka: 1993 (Birobidjan)
Disolo ya Luzingu na Yandi: Papa na yandi fwaka ntangu yandi vandaka toko mingi, mpi mama na yandi muntu sansaka bo, yandi ti mpangi na yandi ya bakala. Yandi ke salaka na pharmacie. Yandi ke zolaka kusala nsaka mosi ya bo ke bingaka patin à glace, kunata velo mpi kusala nsaka ya bo ke bingaka volley.
Yandi sepelaka ti Biblia ntangu yandi vandaka kulonguka kisalu ya kutunga bilele na ekole mosi ya vandaka kulonga bana bisalu ya maboko. Bikalulu ya mwana mosi ya nkento ya nzo-nkanda na bo simbaka kibeni ntima na yandi. Mwana-nkento yango vandaka Mbangi ya Yehowa. Kivuvu ya lufutumuku pesaka yandi kikesa ntangu kisoni na yandi fwaka na 2014 ti bamvula 12. Yandi bakaka mbotika na 2017
Mambu ya Salamaka
Na Februari 6, 2020, Bamfumu ya Russie na Birobidjan fundaka bankento sambanu ya Bambangi ya Yehowa. Tatiana vandaka na kati na bo. Na ntangu yina, yandi vandaka ti bamvula 27. Bo fundaka bampangi bankento yai nde bo kele “bantu ya ntu-ngolo” kaka sambu bo vandaka kusala mambu ya dibundu na bo. Na kimvuka, bo vandaka kulandila Bambangi ya Yehowa 19 ya ke zingaka na nziunga yina.
Tatiana ke ndima kibeni nde, kana yandi ke landa kukanga ntima na mpasi yai, yo kele sambu Yehowa ke sadisa yandi. Yandi ke tuba nde: “Ntangu mbangika yantikaka, mono vandaka ve kukuka kusambila Yehowa mutindu mono vandaka kusambila yandi ntete. Ata mpidina, mono vilaka ve kutanga Biblia. Mono songaka Yehowa mambu yonso ya vandaka kupesa mono boma. Mono lombaka yandi mpeve santu sambu yo sadisa mono na kukanga ntima mpi na kukangama kaka na yandi tii na nsuka. Mono lombaka yandi na kupesa mono kikesa mpi mayele sambu na kukotila zina na yandi na tribinale.”
Yandi ke tuba diaka nde: “Kuzaba nde Yehowa ke sadisaka bansadi na yandi mpi ke taninaka bo ntangu yonso me sadisa mono na kulanda kuvanda na kiese. Yehowa me simba mono na diboko na yandi ya kitata. Yandi muntu ke sadisa mono na kutudila yandi ntima mpi na kudiyangisa ve na ntwala ya mimekamu.”—Yezaya 41:10.
Awa ya mpangi Tatiana ke kinga lukanu yina tribinale ta baka, beto ke ndima kibeni nde yandi ta landa ‘kukanga ntima na mimekamu’ ti lusadisu ya Yehowa.—Baroma 12:12.