AUGUSTI 17, 2021
RUSSIE

Mpangi Vassili Melechko Kele Mbangi ya Yehowa ya Iya Yina Bo Ke Zengila Boloko na Teritware ya Krasnodar na Nima ya Kusambisa Mambu Ntinu-Ntinu

TALA NA

Mutindu Mambu Salamaka

Na Oktobri 7, 2021, Tribinale ya Teritware ya Krasnodar buyaka mukanda yina mpangi Malechko kotisaka sambu na kulomba nde bo tadila diaka lukanu yina bo bakaka. Lukanu yina bo bakaka sambu na yandi ta soba ve
Augusti 11, 2021

Tribinale ya Distrike ya Abinski na Teritware ya Krasnodar zengilaka mpangi Vassili Melechko boloko ya bamvula tatu na nima ya kuwidikila yandi bilumbu zole. Kaka na nima pana, bo nataka yandi mbala mosi na boloko. Yandi kele Mbangi ya Yehowa ya iya yina tribinale ke zengila boloko na nima ya kusambisa mambu ntinu-ntinu a
Augusti 11, 2021

Bo yantikaka kusambisa Vassili. Na ntwala ya zuzi, Vassili tubaka na kikesa yonso nde yandi kele Mbangi ya Yehowa
Yuni 24, 2021

Na kati ya mambu yina bo fundilaka Vassili, bo yikaka masolo yina yandi solulaka ti mpangi Aleksandr Ivchine. Zuzi ya nene (procureur) tubaka nde bo solulaka mambu ya dibundu sambu bo tubilaka “kisalu ya Yehowa Nzambi”
Aprili 12, 2021

Na kati ya mambu yina bo fundilaka Vassili, bo me tuba nde yandi vandaka “kusala mpi kuwidikila badiskure ya me simbama na mikanda ya dibundu” mpi nde yandi vandaka “kupesa maboko na masolo yina kimvuka vandaka kusolula ya vandaka kukatuka na mikanda ya dibundu.”
Aprili 7, 2021

Na 6:30, basoda tatu ti minduki, bantu iya ya ke salaka ba-anketi na banzo ya bantu mpi bapolisi zole kotaka na ngolo na nzo ya Vassili mpi Zoya Melechko. Na nima, bo bakaka Vassili mpi bo kwendaka ti yandi sambu na kumanisa ba-anketi ya bo vandaka kusala. Bantu yina ke salaka ba-anketi kangaka yandi bafoto na ntwala ya nzo na yandi mpi na ntwala ya nzo yina bampangi vandaka ntete kusala balukutakanu. Bantu yai sadilaka bafoto yina sambu na kumonisa nde Vassili me fwa nsiku. Bo songaka Vassili nde yandi fwete basika ve na mbanza

Bansangu ya Luzingu na Yandi

Vassili Melechko

Mvula mpi Kisika Yina Yandi Butukaka: 1961, (Mikhaïlovskoïe, Teritware ya Krasnodar)

Disolo ya Luzingu na Yandi: Ntangu Vassili vandaka toko, yandi vandaka kuzola kusadila bisadilu ya radio. Yandi salaka banzo-nkanda sambu na kukuma muntu yina me zaba mbote-mbote mambu ya radio (ingénieur radio). Na nima, yandi kumaka kunata kamio mpi yandi kumaka kusadila masini yina bo ke bingaka zeki (grue). Yandi kwelanaka ti Zoya na 1981

Yandi ti nkento na yandi, bo yantikaka kulonguka Biblia ti Bambangi ya Yehowa. Zoya bakaka mbotika na 1991. Vassili bakaka mbotika mvula mosi na nima. Dilongi ya simbaka kibeni ntima na yandi vandaka kivuvu ya lufutumuku

Bo vandaka ti mwana mosi ya bakala mpi mosi ya nkento. Bubu yai bana yina me kumaka bambuta. Na ture na bo, bana na bo yai ke longa mpi bana yina bo me butaka malongi ya kieleka yina kele na Biblia. Dibuta ya mvimba ke zolaka kukwenda kuloba bambisi mpi kusala mambu ya nkaka.

Bansangu yai ya beto ke wa yina bo ke sambisa bampangi na beto ya babakala mpi ya bankento na Russie ntinu-ntinu mpi bo ke niokula bo kele “bansangu ya mbi.” Kansi beto ke ndima kibeni nde Vassili ti dibuta na yandi ta landa kuvanda ngolo mpi ta lemba ve ntangu yonso ya bo ta “tulaka ntima na Yehowa.”—Nkunga 112:7, 8.

a Bo zengilaka mpangi Oleg Danilov boloko ya bamvula tatu na Marsi 30, 2021. Bo zengilaka mpangi Aleksandr Ivchine boloko ya bamvula nsambwadi ti ndambu na Februari 10, 2021. Bo zengilaka mpangi Aleksandr Chtcherbina boloko ya bamvula tatu na Aprili 6, 2021.

BANSANGU YA MPA