MAYI 10, 2021
RUSSIE
NSANGU YA MPA | Mbandu ya Bampangi-Babakala mpi Bankento Ke Pesa Mpangi Vitali Ilinykh Kikesa
Na Kitanu 15 avril, Tribinale ya Distrike ya Oussouriisk na Teritware ya Primorié tubaka nde mpangi Vitali Ilinykh me fwa nsiku mpi bo me zengila yandi boloko ya bamvula zole. Kansi yandi ta kota ve boloko.
Bansangu ya Luzingu na Yandi
Vitali Ilinykh
Mvula mpi Kisika Yina Yandi Butukaka: 1974 na Oussouriski na Teritware ya Primorié
Disolo ya Luzingu na Yandi: Yandi bakaka diplome na nzo-nkanda ya bapolisi mpi yandi vandaka kusala na babiro ya bapolisi. Mbala mingi yandi vandaka kudiyula sambu na nki bantu ke fwaka mpi nki ke kuminaka beto na nima ya lufwa. Yandi yantikaka kulonguka Biblia ti Bambangi ya Yehowa na kati-kati ya mvula 1995. Yandi bakaka mbotika na 1999. Sesepi yai, yandi me kumaka kusala kisalu ya kutula bunkete na bala-bala. Yandi balanaka ti Irina na 2006
Mambu Yina Salamaka
Na Februari 2019, bapolisi kwendaka kusala baanketi na nzo ya mpangi Vitali Ilinykh sambu bo vandaka kulandila Bambangi ya Yehowa ya mbanza Spassk-Dalni. Na Septembri 18, 2019, bamfumu ya Russie yantikaka kulandila mpangi Vitali. Na Oktobri 23, 2019, bapolisi kotaka diaka na nzo ya mpangi Vitali sambu na kusala baanketi. Kansi na mbala yai, bo kangaka yandi mpi bo tulaka yandi na boloko sambu na bilumbu zole. Mpangi Vitali sambaka Yehowa ntangu yandi vandaka na boloko. Yandi ke tuba nde: “Ntangu mono sambaka Yehowa, mono vandaka diaka ve kuwa boma sambu ntima kitaka mono mpi mono kumaka na ngemba.”
Ntangu yandi basikaka na boloko, bo buyisaka yandi na kusala ba voyage. Bo vandaka mpi kusambisa mama na yandi, mpangi Olga Opaleva, sambu na diambu ya nkaka.
Mambu yai ya mpangi Vitali me kutanaka ti yo, me longaka yandi mambu mingi. Yandi ke tuba nde: “Ntete, mono vandaka kuzaba nde Yehowa lenda bika ve nde beto kutana ti bampasi kuluta yina beto lenda kangila ntima. Sesepi yai, mono me mona mpenza mono mosi mambu yai na luzingu na mono. Ntangu bampasi ya beto ke kutana ti yo na luzingu ke kumaka ngolo, yo ke sadisaka beto na kukumisa diaka kinduku na beto ti Yehowa ngolo. Yehowa kele Muwumbi mpi kana yandi ke bika nde bampasi kukumina mono na luzingu, yandi ta sadisa mono na kukangila yo ntima mpi yandi lenda sadila bampasi yango sambu na mambote na mono. Kana mono me mona nde mono ke kuka diaka ve kukanga ntima na bampasi ya mono ke kutana ti yo, mono ke sambaka Yehowa sambu yandi pesa mono ‘ngolo yina me luta ngolo ya bantu.’”—2 Bakorinto 4:7.
Mpangi Vitali ke vandaka madidi-madidi, kansi yandi bakaka kikesa ntangu yandi yindulaka mingi mambu ya kele na 1 Piere 5:9. Mbandu ya bampangi na beto mingi ya Russie yina ke kanga ntima ti kikesa na bampasi, ke sadisaka yandi mpi na kuvanda kikesa. Mpangi Vitali ke tuba ti kikesa mambu yai: “Ata Yehowa me bika nde tribinale kuzenga mambu na mono konso mutindu yina, . . . yo kele dibaku ya mbote sambu na mono ya kulonga nsangu ya mbote na bamfumu na bilumbu yai ya nsuka.”
Bonso Vitali, bambandu mingi ya lukwikilu mpi ya kikesa ya beto ke monaka na bansadi ya Yehowa ke pesaka beto mpi kikesa. Beto ke pesa mpi Yehowa mersi sambu yandi ke pesaka beto “konso kima ya mbote sambu na kusala luzolo na yandi.”—Baebreo 13:20, 21.