MAYI 25, 2020
RUSSIE
Russie: Dennis Christensen Me Sala Bamvula Tatu na Boloko, Kansi Yandi Ke Bika Ve Lukwikilu na Yandi mpi Yandi Kele Kaka na Kiese
Na kilumbu ya bubu, Mpangi Dennis Christensen me lungisa bamvula tatu na boloko na insi Russie. Bo me tulaka yandi na boloko kansi yandi me salaka ve ata kima mosi ya mbi. Banda bo kangaka yandi na Mayi 25, 2017, bampangi me yulaka yandi sambu na kuzaba inki mpasi yai me salaka na lukwikilu na yandi. Mvutu na yandi ke vandaka kaka kiteso mosi: “Lukwikilu na mono ke kumaka kaka ngolo.”
Mpangi Christensen ke tuba nde: “Mono me monaka nde mambu yai ya Biblia ke tubaka na mukanda ya Yakobo kapu 1, verse 2 tii na 3 kele ya masonga: ‘Bampangi na mono, beno vanda na kiese ntangu beno ke kutana ti mimekamu ya mutindu na mutindu, sambu beno ke zaba nde lukwikilu na beno yina me mekama ke butaka kukanga-ntima.’”
Kima ya ke pesa kiese kele nde, ata Mpangi Christensen ke landa kumona mpasi mingi, lukwikilu na yandi ke landa kukuma ngolo mpi nkutu kiese na yandi ke landa kukuma mingi.
Kaka ntangu bo kangaka Mpangi Christensen, bo tulaka yandi sambu na ntangu fioti na kisika mosi ya vandaka pene-pene ti nzo na yandi na Orel. Na ntangu yina, bo pesaka nkento na yandi Irina nswa ya kukwendaka kutala yandi. Mpangi Christensen vandaka kaka pana bamvula zole ti mwa bangonda. Na Februari 2019, bo zengilaka yandi boloko ya bamvula sambanu. Bangonda tatu na nima, bazuzi buyaka kutadila diaka lukanu yina mutindu yandi lombaka bo. Bo katulaka yandi kisika yina mpi bo nataka yandi na boloko mosi yina kele na kiteso ya bakilometre 200 ti Orel. Kisika mosi ya ntama kibeni ti kisika yina Irina kele.
Yandi me sala kiteso ya mvula mosi banda yandi kele kuna. Yandi me lungisa mambu yina yo ke lombaka sambu bo basisa yandi na boloko na ntwala nde bamvula yina bo zengilaka yandi kulunga. Yandi fulusaka baformilere iya, kansi bo buyaka baformilere tatu. Mambu yai lenda lembisa yandi nitu, kansi yandi ke landa kukangama ngolo na lukwikilu na yandi.
Mpangi Christensen ke tuba na kudikulumusa yonso nde: “Mono ti Irina, beto kele ve bantu ya kukuka, kansi beto me longukaka kukanga ntima mpi kulanda kuvanda na kiese na ntangu ya mpasi. Mpi kima ya kuluta mfunu kele nde beto me kumaka diaka pene-pene ya Yehowa, Nzambi mpi Tata na beto.”
Beto ke samba Yehowa mpi beto ke tula ntima nde yandi ta sadisa bampangi na beto yonso ya babakala mpi ya bankento ya kele na insi Russie na kulanda kukanga ntima na mbangika na kiese yonso.—Matayo 5:11, 12.
BANSANGU YA MPA
Beto Fwete Wa Ve Boma ya Mbangika
Na lukutakanu ya nsuka-mvula ya mvu 2019, Mpangi Mark Sanderson ya Nto-Kimvuka salaka diskure mosi yina vandaka ti ntu-diambu: “Inki Beto Fwete Wa Boma?” Diskure yina vandaka ti kitini yai ya video. Yo ke tubila mambu yina bampangi na beto ya babakala mpi ya bankento yina bo niokulaka na insi Russie kutanaka ti yo.