Na 11 Juin 2022 Presida Vladimir Poutine tulaka siniatire na bansiku zole yina ta sala nde Russie kubasika na Tribinale ya Eropa ya Ke Nwaninaka Banswa ya Bantu banda na 15 mars 2022. Yo ke tendula nde balukanu yonso yina Tribinale yai bakaka banda na 15 mars 2022 ta tadila ve nsi Russie. Yika mpi lukanu yina Tribinale yai bakaka na 7 juin nde Russie fwaka nsiku mutindu bo buyisaka kisalu ya Bambangi ya Yehowa mpi bo lombaka Russie na kukanga diaka ve Bambangi ya Yehowa, na kubasisa na boloko bayina bo kangaka dezia, na kuvutula bima yonso yina bo botulaka mpi na kufuta amande ya 63 milio ya badolare.

Komite ya baministre (Comité des ministres du Conseil de l’Europe) ke landilaka nde bansi yonso ya kele na Tribinale ya Eropa ya Ke Nwaninaka Banswa ya Bantu kusadila balukanu yina Tribinale yai ke baka. Russie vandaka na kati ya Komite yai banda 1996.

Na 15 mars 2022, Russie sonikilaka Komite yai sambu na kumonisa nde yandi ke zola kubasika na kimvuka yai. Na kilumbu ya kulanda, Komite yango basisaka Russie na kati na yo. Komite yai songaka nsi Russie nde na kutadila mukanda yina bo tulaka siniatire ntangu yandi kotaka na kimvuka yai, nsi Russie fwete landa kulemfukila balukanu ya Tribinale tii na 16 septembre 2022.

Russie basisaka bansiku yina zole na 7 juin 2022 nde yo ke zola kubasika na Tribinale ya Eropa ya Ke Nwaninaka Banswa ya Bantu sambu na kubuya kusala mambu yina Tribinale yai lombaka bo na kusala. Yo vandaka kaka kilumbu yango ya Tribinale zengaka mambu mpi bo nungisaka bampangi na beto ya Russie.

Batribinale ya bansi 46 ya kele na Komite ya baministre (Comité des ministres du Conseil de l’Europe) fwete sadila balukanu yina Tribinale ya Eropa ya Ke Nwaninaka Banswa ya Bantu bakaka sambu na Bambangi ya Yehowa. Kima ya kuluta mfunu kele nde, yo me katula makambu yonso yina Russie fundaka Bambangi ya Yehowa. Na ntoto ya mvimba, lukanu yai kele kibeni kimbangi sambu na Yehowa mpi sambu na zina na yandi. Lukumu yonso kele ya Yehowa!—Nkunga 83:18.