Na Octobri 26, 2020, Tribinale ya distrike ya Lgov buyaka diaka nde bo basisa mpangi Dennis Christensen na boloko na ntwala ya bamvula yina bo zengilaka yandi, ata yandi me sala dezia bamvula kuluta tatu na boloko. Yandi kele ti bilumbu kumi sambu yandi lomba nde bo tadila diaka lukanu yina. Bo fwete basisa mpangi Christensen na boloko na ngonda ya Mayi 2022. Bo fwete basisa yandi na ngonda yina sambu bo me tanga mpi bilumbu yina yandi me sala dezia na boloko banda na ntangu yina bo tulaka yandi na kasho sambu na mwa ntangu na ntwala ya kusambisa yandi. Kansi na ngonda ya me katuka kuluta, bamfumu ya boloko tubaka nde “yandi vandaka mpenza kufwa” bansiku ya boloko. Yo ke monana nde bamfumu ta basisa yandi ve na boloko na ngonda ya Mayi 2022 ata yandi me sala dezia mwa ntangu na kasho yina bo tulaka yandi na ntwala ya kusambisa yandi.

Banda bo kangaka mpangi Christensen na Mayi 25, 2017, yandi ti nkento na yandi Irina ke niokwama mingi na mabanza, na mawi mpi na nitu. Ata mpidina, bo zole ke vandaka kaka na kiese mpi bo ke vandaka ti lukanu ya kulanda kukanga ntima mpi ya kubika ve nde bampasi yai kulembisa lukwikilu na bo. Kima ya ke sadisaka bo mpi, kele bisambu yina bampangi na bo Bambangi ya Yehowa ya babakala mpi ya bankento ya ntoto ya mvimba ke salaka.