Na Oktobri 7, 2020, Tribinale ya distike ya Maïski na République de Kabardino-Balkarie tubaka nde mpangi Youri Zalipaïev salaka ve mambu ya mbi. Yo yina bo katulaka mambu yonso yina bo fundilaka yandi. Prokirere kele ti bilumbu kumi sambu na kulomba nde tribinale kutadila diaka lukanu yina.

Prokirere fundaka mpangi Zalipaïev nde yandi vandaka kupusa bantu na kusala mambu ya mubulu. Kansi bantu kuluta 30 tubaka nde mpangi Zalipaïev salaka ve ata kima mosi ya mbi mpi nde yandi vandaka kaka kusonga bantu na kutanga Biblia mpi na kuvanda ntima-mbote mpi mawete ti bantu yonso.

Lukanu yina ya tribinale ya kutuba nde yandi “salaka ve ata mbi mosi” simbamaka mpi na mambu yina Kimvuka mosi ya ONU ya Ke Talaka Mambu ya Bantu Yina Bo Me Kangaka Kukonda Lunungu (Groupe de travail de l’ONU sur la détention arbitraire) tubaka. Rapore ya kimvuka yina tubaka nde, Bambangi ya Yehowa kele ve bantu ya mubulu mpi bo ke pusaka ve bantu na kusala mubulu.

Ntangu bo bakaka lukanu yai, mpangi Zalipaïev tubaka nde: “Yo vanda bantu ya dibuta na mono to banduku na mono, beto yonso kudibongisaka sambu beto zabaka nde bo ta tuba nde mono me salaka mbi mpi bo ta zengila mono boloko. Mono ke pesa Yehowa mersi sambu mono vandaka ve kudiyangisa mingi ntangu bo vandaka kusambisa mono. Mono kele na kiese mpi mono ke pesa mersi na bantu yonso yina monisaka nde mono salaka mbi ve.”