Na 22 février 2022, Tribinale ya Eropa ya Ke Nwaninaka Banswa ya Bantu (CEDH) bakaka balukanu zole mpi yo nungisaka Bambangi ya Yehowa 15. Yo vandaka sambu bapolisi vandaka kuniokula bampangi na beto mutindu bo vandaka kukotila bo na banzo na ngolo banda na 2010 tii na 2012. Tribinale monisaka nde insi Russie zitisaka ve banswa yina bampangi na beto ke vandaka ti yo disongidila nswa ya kupona na luzolo na bo mosi kusambila na konso dibundu yina bo me zola. Tribinale lombaka insi Russie na kufuta bampangi mbongo badolare 112 323 sambu na mpasi yina bo pesaka bo. Balukanu yai kele ya nsuka mpi bo lenda lomba diaka ve tribinale na kutadila yo diaka.

Balukanu yina zole ya Tribinale vandaka kutadila mpi makambu sambanu yina bo fundilaka insi Russie. a Bantu ya fundaka tubaka nde bapolisi sadilaka ve mbote mikanda yina bazuzi pesaka bo (mandats de perquisition) sambu na kukotila bampangi na banzo na bo, kukota na Nzo ya Kimfumu mosi, kukanga bampangi bankento zole yina vandaka kusamuna mpi kusimba-simba bo na nitu sambu na kusosa bima mpi kubotula bima ya bampangi na beto. Bantangu ya nkaka, basoda ya Russie (FSB) yina vandaka ti bilele ya kufika na elungi mpi minduki, vandaka kukotila bampangi na kingolo-ngolo na banzo na bo mpi bo vandaka kusadila bo mambu na nku yonso.

Bantangu ya nkaka, Bambangi ya Yehowa vandaka kusolula ti André Carbonneau, muntu mosi ya mayele ya ke longukaka banswa ya bantu ya ntoto ya mvimba (spécialiste du droit international relatif aux droits de l’homme). Yandi tubaka nde lukanu yai ya Tribinale me baka “me monisa kibeni pwelele nde insi Russie vandaka kukota kukonda nswa na banzo ya Bampangi ya Yehowa. Yo ke tadila mpi bambala 1700 yina bo kotilaka Bambangi ya Yehowa na ngolo na banzo na bo banda bo me buyisaka kisalu na bo na 2017. Bubu yai, kana bo me kotila muntu na ngolo na nzo na yandi kaka sambu yandi kele Mbangi ya Yehowa, yo ke fwa bansiku ya mukanda ya bo ke bingaka Convention Européenne.” Yandi yikaka nde: “Tribinale pesaka bamfumu ya Russie foti sambu bo vandaka kubuyisa Bambangi ya Yehowa na kulonga nzo na nzo. Yo ke monisa nde Tribinale ya Eropa ya Ke Nwaninaka Banswa ya Bantu (CEDH) ke tadilaka kisalu ya kulonga nsangu ya mbote bonso kisalu ya dibundu yina bamfumu ya luyalu kele ve ti nswa ya kubuyisa.”

Balukanu yina zole ke tadila ve mpasi yina bampangi ke kutana ti yo bilumbu yai na Russie kansi yo me kangudila tribinale nzila sambu na kubaka balukanu ya nkaka na mutindu bo me buyisa kisalu na beto na nsi yai. Tribinale ke landila diaka mambu 60 ya nkaka ya ke tadila Bambangi ya Yehowa na Russie. Beto ke tula ntima nde balukanu yai zole ya Tribinale me baka ta sala nde bo baka diaka balukanu ya nkaka ya mbote na bilumbu ke kwisa.

Beto yonso kele na kiese mutindu bamfumu ya ke landilaka banswa ya bantu ke kotila bampangi na beto ya Russie ya ke landa kukangama na Yehowa. Balukanu yai ke monisa nde Yehowa ke sakumuna bikesa yina beto ke sala sambu na kunwanina lukumu ya zina na yandi mpi kupesa maboko na luyalu na yandi.—Nkunga 26:11.