Na Kiya Mayi 16, tribinale ya nene bingaka diaka mpangi Dennis Christensen sambu na kuwa yandi. Prokirere ti baavoka tubaka bangogo na bo ya nsuka mpi na nima, bo bikilaka mpangi Dennis ngunga kiteso ya mosi sambu yandi pesa bikuma yina yandi ke lomba bo na kubasisa yandi. Mimonisi yina katuka na bansi ya nkaka ti bimwangi-nsangu vandaka pana. Ata dikambu yai ya mpangi Dennis me sala bamvula zole, yo ke pesa kikesa na kumona mutindu nsangu na yo me panzanaka na bansi ya nkaka mpi mutindu bantu ke tudilaka yo dikebi mingi.

Ntete, bazuzi tubaka nde bo ta zenga mambu na Kitanu ya Mayi 17, kansi bo pusaka yo diaka tii na Kiya ya Mayi 23 na ngunga ya kumi na ntwala ya midi. Bazuzi pesaka diaka mpangi Dennis dibaku ya nsuka ya kutuba na ntwala nde bo baka desizio ya nsuka. Beto me zaba ve kana bo ta zenga dikambu yai na nkokila ya Mayi 23 to kana bo ta pusa yo diaka kilumbu ya nkaka.

Yo ke pesa beto kikesa na kumona bampangi na beto ke tadila mambu na mutindu ya mbote mpi ke monisa mpusa na bo kubikala ya kwikama, mu mbandu mpangi Dennis Christensen mpi Sergey Skrynnikov. Mutindu ntumwa Polo kudiwaka sambu na bampangi ya Tesalonika, beto mpi ke kudiwa mutindu mosi sambu na bampangi na beto ya Russie. Yandi sonikaka nde: “Beto ke kudikumisaka sambu na beno na kati ya mabundu ya Nzambi sambu beno ke kanga ntima mpi beno kele kaka ti lukwikilu, ata beno ke kutana ti bambangika mingi mpi bampasi mingi.”—2 Batesalonika 1:4.