NEW YORK. Na Kiya, Mayi 3, 2018, tribinale ya Saint-Pétersbourg ta tadila mambu yina Bambangi ya Yehowa lombaka nde bazuzi kutadila diaka sambu na lukanu yina tribinale bakaka ya kubotula babiro yina Bambangi ya Yehowa ya Russie vandaka kutwadisa kisalu na bo. Kana tribinale me buya kutadila diaka mambu yai, leta lenda botula mbala mosi lupangu yango ya kele ti banzo 14. Lupangu yango kele ya ba hectares 10 mpi valere na yo na mbongo kele ya bamilio ya badolare kiteso ya 31,8.

Na lukanu ya ntete yina tribinale ya distrike ya Sestroretsk bakaka na Desembri 2017, bo tadilaka ve banzikisa ya ke monisa nde lupangu kele ya Watch Tower Bible and Tract Society of Pennsylvania (WTPA) yina kele kimvuka mosi ya ke sosaka ve kukotisa mbongo; yo kele na États-Unis. Bambangi ya Yehowa ya Russie pesaka Watch Tower Bible and Tract Society of Pennsylvania lupangu yina na mvu 2000. Na mvula yina, Watch Tower Bible and Tract Society of Pennsylvania futaka kiteso ya bamilio 3 ya badolare sambu na mpaku na Féderation ya Russie. Ata luyalu ya Russie me zabaka nde Watch Tower Bible and Tract Society of Pennsylvania me zitisaka nsiku mutindu bo ke futaka mpaku yai kuluta bamvula 17, tribinale ya distrike yina ke tuba ntangu yai nde kontra yina kele diaka ve mfunu. Yo yina, bo ke tuba nde munkwa ya bima yina yonso kele Kimvuka ya Bambangi ya Yehowa ya Russie Yina Ke Twadisaka Kisalu. Mutindu Tribinale ya nene me kangaka babiro yango na 2017, kana Bambangi ya Yehowa me nunga ve mambu yai na tribinale, bamfumu ya Russie ta sadila lukanu yai: Leta ta botula mbala mosi banzo yina yonso.

Bo ta tadila diaka mambu yai na Mayi 3, 2018 na 11 h 30 na tribinale ya Saint Pétersbourg, ul. Bassenay, 6, na Saint Pétersbourg na Russie.

Nimero ya kumwangila nsangu:

International: David A. Semonian, Office of Public Information, +1-845-524-3000